Child Labour ajanga ‘Make in India’ raksatsütsü: Satyarthi

New Delhi, March 13 (Agencies): Nobel Prize angusang, Kailash Satyarthi-i, Child Labour (tanurtem mapa inyakdaktsüba) anema ozüng tesashi melira, ibaji ajanga Ato kilonser, Narendra Modi’er ‘Make in India’ programme raksatsütsü, ta ashi.
Ato Kilonser Modi dang shidi ka ajanga pai, “Bendang linüktem nungi tangar sen intoka shishilembatsü atema India linüki arura aser International standards den medemdangdang nenok (sorkar) indang child labour ozüngtemji tashimait süra ibaji ajanga Make in India raksatsütsü,” ta ashi.
Pai, ‘Make in India’ programme ya mera tulu ka lir, saka ibaji ajanga linük nung tashimaitem sayur, ta ashi.
“Manufacture asüba Sector nung tanurtem timtemdaktsüba aser mapa inyakdaktsüba ajanga “Make in India” takok mangutsü,” ta arishi küm 62 aser ‘Bachpan Bachao Andolan’ tentetsang, Satyarthi-i osangbenertem dang ashi.
Apple company tatishitsü amshia pai, US nung amenoka aliba company-i parnok osettem yanglutsü atema China nung tanurtem mapa inyakdaktsüba atema aikati parnok aitsüogo, ta ashi.
2014 küm Nobel Peace Prize angusang aser tanurtem temeten atema inyaksang Satyarthi-i, “India nung tanurtem mapa inyakdaktsür, kechiyong nenok (sorkar) ozüngtem ajanga ibaji temelaba agütsür. Item brands tuluji local producer tem dak metaloka lir aser parnoki tanurtem mapa inyakdaktsütsü lenmang sadema lir. Saka International media aser meimchir temeten teloktemi asenok dang tai matoktsü,” ta ashi.
Rotary India Literacy Mission nungittsü atema pa Kolkata-i oa liasü.
Ano külen Satyarthi-i, “Sorkari ‘clean India’, ‘Skill India’ aser ‘Digital India’ missions atema jembir, saka külenbo tanurtem süngo dokan, shiruru tepsetba kitem, hotel aser lendong aketba industry tem nung mapa inyakdaktsür,” ta ashi.
Tang pai Child Labour Prohibition & Regulation Amendment Bill atema teinyaktak lir.
Paisa, “Ni MP ajak dang tanurtem tesentok ta shijen ashir. Asen tanurtem atema yimtenren lenirtemi khuret agitsüla, ta ashi.
Tanurtem mapa inyakdaktsüba ya tanu puto nung alar tia lir, ta pai aitsü.
1981 küm nungi pai Child Labour anema inyak tenzük, iba mapang nung child labour anema India nung ozüng maliasü. 1986 küm Child Labour Prohibition & Regulation Act agizüka liasü.
Tang tashi nung Satyarthi aser pa indang Bachpan Bachao Andolan teloki tanur 83,000 dak tema kümzükogo.
International Labour Organisation (ILO) report osang ajanga ashiba agi, India nung arishi küm 5 nungi 17 tsüngdapur million 5.7 bo mapa inyakertem lir.