Malaysia nung Dengue züina akümer

Kuala Lumpur, March 13 (Agencies) : January nungi March 10 tashi nung Malaysia anüdoklen Sabah state nung dengue agi shiranger nisung 913 kümogo, aser ibai yaküm kasa mapang dang nungi 70 agi timba lir, ta osangbenertemi Deobarnü metetdaktsü.
State Health Department Director, Christina Rundi-i, iba tashidak agi shirangerji tzükümlen aliba Sandakan district nungi timba lir. Iba tashidak agi linük nung nisung 913 shiranga aliba rongnung Sandakan district nung nisungi 319 aser parnok sülen Kota Kinabalu nung 152 aser Tawau nung 72 lir, ta EFE osang ajanga metetdaktsü.
Ita piyong ‘Dengue Control & Prevention’ sentong magi asübo iba tashidak yagi Sandakan nung tang dang nungi timba shiranga lila. Iba sentong ya March 15 tashi agitsü aser iba inyakyim ajanga iba tashidak noklang nung shilem 96 agi tajemba kümogo, ta lai ashi.
Iba sentong ajanga tesem 112 tongogo aser iba mapang ki 12, 014 semdangogo.
Tesem 150 nungbo mesen asütsü mokozü dena yokogo.