Osang tai agütsür candidate tem tepuokdaki yoktsü benokogo: EC

Hyderabad, March 13 (Agencies): Election affidavit nung osang tai agütsür candidate tem tepoukdaki küm ana yoktsü atema Election Commission (EC)-i benokogo, aser ibaji  Union Law Ministry-i reprangshidar, ta yashi Chief Election Commissioner (CEC), Nasim Zaidi-i metetdaktsü.
National Election Watch  aser Association for Democratic Reforms nati ayongzükba 12buba Electoral & Political Reforms National Conference nung jembidang Zaidi-i, “Osang tejangja miimshitsü merangra, ibaji temzüng alema lir, anungji  affidavit nung osang miimshiba mesüra osang tai agütsüba atema  temerenshiji küm ana tepoukdaki yoktsüla ta Commission-i benokogo,” ta ashi.
Paisa ashiba agi, candidate temi tatalokbatem, talisa ozüng alema inyaka alibatem osang metetdaktsütsüla. Candidate temi item osangji ajunga magütsüra mesüra osang kar miimshira vote agütsütsüpurtemi parnok indang osang tesadang ka dang meteter.
Paisa, “Tang tashi nungbo electoral trusts-i bendanglen nungi sen agiba menokdanger. Parnoki senji yimtenren party tem nem agütsür, anungji bendanglen nungi aruba senji indang-indanga mesüaka party tem dangisa aor aser ibaji party tem dangbo memelar,” ta ashi.
“Ibayongji electoral trusts-i bendanglen nungi sen agizükba nokdangtsüla ta Commission-i benokogo, aser ibajia reprangshidar,” ta Zaidi-isa ashi.