Alima lennirtemi Sri Sri nem tenüngsang agütsür

New Delhi, March 13 (Agencies): Deobarnü alima lennirtemi Art of Living (AoL) aser tentetsang, Sri Sri Ravi Shankar-i World Culture Festival ayongzüka amungba atema tenüngsang agütsü aser parnok linük semdangtsü atema Ravi Shankar jaok.
British Prime Minister, David Cameron-i House of Commons nung o jembitsü atema Ravi Shankar jaok aser külen Australia Prime Minister, Malcolm Turnbull-i taruba World Culture Festival par linük nung amungtsü atema AoL jaok.
Conservative Party nungi MP, Matthew Offord-i New Delhi nung World Culture Festival nung aden aser Cameron-i pa ajanga Ravi Shankar jaokba osang metetdaktsü.
“Tarutsü nung nai kodang UK-i semdangdir House of Commons nung o jembitsü atema British Prime Minister David Cameron-i na jaoker” ta Offord-i metetdaktsü.
“Nisung shingaia alima meyanglushitettsü ta ashir saka Sri Sri-i mapa kanga junga tenzükogo. Onoki teimla ka angur. Art of Living foundation ajanga yimjung aser tangatettep ajungketer” ta British prime minister-i züluba shidi nung shia liasü.
Iba sentong nung Australia prime minister mendentet saka pai AoL dangi sangdong ka nung taruba benjungji Australia nung amungtsü atema Sri Sri jaoka zülua liasü.
Colombia President, Juan Manuel Santos-ia sangdong ka yok aser iba nung, “tangatetba tajung aser nisung libaliro ajungkettsü atema iba benjung nung alima ajungalen nungi adenshia amunger. Sri Sri asenok dang tepela aser yimjung indang sayur, itemji asenok shia dak lir aser asenoki itemji ajitettsüla” ta metetdaktsü.
Ano, German parliamentarian aser Christian Democratic Party (CDU) deputy chairman, Armin Laschet-ia sangdong ka nung, “Küm metsür pungu tejaklen, Berlin nung jara ka liasü aser ibaji adena senzüdang nisungtem kahset. Tanü Russia aser Ukraine, Syria nung aser Africa kübok shilem kar nung kiralongrar aser azütokshi indang jara ka lir” ta metetdaktsü.
Armin-isa World Culture Festival nem tenüngsang agütsü aser iba ya “Act of Understanding” ka lir aser iba ajanga tarutsü nung alima melenshitsü, ta shisem.