Temulungjang ka ser inyaktsüla

Naga yimten tebilemtsü indang ya jungjunga bilemdangra kanga shisabolutsüba mapang ka lir, kechiyong telok kati India sokar den jembir aser telok pongo troki repranga atar. Aji oda, telok ka jagi Naga yimten nüjiso jenjang ka lateta bener marutetra tanüngba teloktem jagi aitsütsü. Idangji, ano Naga nunger rongnung telemsa taliang adoka rarateptsü. Iba ama timtem lendong tia asenok jakdang aruya anguba agi, Naga nunger yimten aser lokti telok ajaki Naga nunger telok ajaki shilem agia India den jembidaktsüner. Ibaji angateta Naga nunger linük tenzüker telok ajaki teti asoshi shitakba telemtetba agitsü bilema lira, parnok telok ajak temang dena ka küma melongjemtetyonga temulungjang ka ser tangatetba nung inyaktsü mapang tongogo. Iba amaji ka tang meinyakra, ano Naga nunger linük tenzükertem telok balala tsüngda kenü kati telok ka toktsür oli, ano kenü telok kati  aruli ta tamongdak ka maka linük tenzükertem tuluba nungi tilaba tashi senzüpet senzütsü, idangjibo Naga nungertem rongnung temulung melemtep tali adoktsü aser azü tokshitsü. Tanü putu nung balaka alima kanga karaa aiener, anungji asenoka iba lima den jangyumedema alitsüsa akümer. Idangji, asenok kümsa küm India nungeri asazüka yutsüba designated camp nungibo tangar menepa masemtettsü. Koba telok südir süang, tang designated camp aliba yabo India soakari asenok pei kidang puoka ayuba den kasa lir. Anungji, iba camp nung lia asenok meputep tali adoktsü aser alima tashitemetet aser terenlok nung rajang akümtsü. Ibaji angateta asenok designated camp nung alir aser malir ajaki Naga nunger putepa alitsü indang jembia yimten mapa nung temulung ka ser inyaktsü apusotsüla. Tang amai India sorkar den merarateptsüsa yimjung nung aliba agi, kecha shisabolu melii Naga yimten latettsübaji kecha süoki ia bilema malitsüa akok. Ajisüaka, asenok Naga nunger yimten tebilemtsü melatetteti kobapiga menudir papikaji asenok kangshitsü aser asenok rongnung telemsa tali tali adoktsü. Idangjibo, kenüamati kar telok kati oli ano telok kar telok kati aruli ta kecha tangatetba ka mali tom nung senzürtem dang kümadoktsü. Idangjibo tulurtemi tilartem dak temulung melemtettsü aser tilartemi tulurtem anema apusotsü. Naga nunger asoshi lendongji aji ka asütsü. Joko, iba amaji asenok rongnung senzü tenzükogo aser item anemaji telok balalai taküm samatsütsü bushi tenzük nungbo ano asenok tia tamalen dang nungibo tesü tia tamajungba asütsü. Aji oda, kodang asenok linük tenzükertem rongnung telok balala tsüngda oli aruli asüba tenzükdir, idangji India tsüngdang Naga nunger sentsü tanuba akümer aser asenoksasa asenok menüdong kümdaktsür. Iba jagi ano India den telatetba kati arutsü mapangang atsülangtsü akok. Joko, telok ajak nung Naga nunger lenirtema tambur akümer, anungji küm 10 tsüngda parnok aika tashi anentsü, anungji ano tashi manendang parnoki parnok mapang nungsa Naga yimten tebilemtsü ya metembangra, ashiko küm 10 sülen lanurtem mapangbo tangatetba balaka nung Naga yimten anitsüa akok. Item shisabolu khuret ajakji angateta Nagaland tatartem rongnungi shimba Parliamentary Working Committee (PWC) nung adenertemi balaka Naga nunger linük tenzükertem telok ajak anir India den ajurua jembitsüsa tashi amshitsüla. Tang tashibo PWC ajanga shisa tajung ka bener Naga nunger linük tenzükertem den Naga yimten tebilemtsü süoki ia jembibabo kangabo mangashir. Aji oda, tawa Delhi nung NSCN-IM lenirtem ajuruba aser tang aruagi Chumukedima nung tanüngba Naga nunger lenirtem den sensaksemba sentong ama jagi Naga yimten tebilemtsü melatettettsüa akok. Ajisüaka, shitakba süoki ia inyakdi süra, Naga yimten tebilemtsü latettsüba lenmang aser yimya ya telok tulu nung masü saka telok tila aser kiboksem nung yimten yimsüsür aser lenirtem den ajurtepa sensaksemba agidang latettettsü.