Mokokchung nung ‘Craft Bazar’ sentong akar

Mokokchung DC Sushil Kumar-i Mongulbarnü Mokokchung nung ‘Craft Bazar’ sentong tenzüktsüdang tangokba noksa nung angur. Mokokchung, March 15, 2016.

Mokokchung, March 15 (TYO): Development Commissioner (Handicraft), Ministry of Textiles, Government of India, New Delhi teyari ajanga Nagaland Handloom & Handicrafts Development Corporation Ltd-i ayongzüka Mongulbarnü nungi tenzüka anogo ter nü atema yangi Imkongmeren Sports Complex Mokokchung nung ‘Craft Bazar’ ta ser yokshiyokraba sentong ka kadaki.
Tanü iba sentong Mokokchung Deputy Commissioner Sushil Kumar Patel (IAS)-i meraketa tenzüktsüogo. Iba sentong nung Nagaland, Manipur aser Assam state-tem nungi kija/telok noklang ka shi arua shilem agidaki.
‘Craft Bazaar’ nung ya chiyungtsü, abensüoshi, kisen, sobaliba sobusolem aser nüngdakba oset tapu meyina jenjang dalang yong yokdaki. Tejangrartemi anepdang 10:00 ako nungi nikong 5:00 tashi nung oa semdangtsü akok. Iba sentong March 24, 2016 tashi lapoktsü.
Tanü iba osangbeneri Mokokchung DC Sushil den jembidang, iba ama sentong akaba ya jangratemtsüka lir kechiyong iba ajanga asen kidanger state den tembar ayimba den shilem agirtem kati ka nungi shisatsü angazükteper ta pai ashi.
Tangar den tokteptsü asoshi asenokia pei sempet amshiba den tawa tanü adokba koltem teyari ajanga osettsüset tajungtiba nung aika yanglua ayoktsü merangtsüla, kechiyong alima ya tetoktepba agi süngogo, anungji, asen lima nung dang masü saka bendanglimai bener yoktsüsa nükla yur meranga inyaktsüla ta paisa tayongzükba ka agütsü.
India sorkari teka mapa inyakertem atema mapatong balala lapokja kar, anungji, “iba maongkaji asenoki agitsü merangtsüla” ta paisa shisem.
District administration-ia akokba tashi iba luyimba tsütsü apu laja arudaki, lisopur state mesüra International expo balala nung shilem aginertemi administration den tongtepratepra, yariteptsü mulunga aliba indang paisa shia liasü.