Haryana nung Congress MLA asem ita trok atema anentsüogo

Chandigarh, March 15 (Agencies) : State angh-i jembiba o tezüluba nung aliba shiditem shisaba ajanga Mongulbarnü opposition party nungi congress MLA asem, Haryana assembly nungi ita trok atema anentsüogo.
Kuldeep Sharma, Jagbir Malik aser Jaiveer Singh nunger mapa nungi anentsüba ya Haryana assembly nung speaker Kanwar Pal-i metetdaktsü.
MLA asem ya assembly nung committee senden kecha nunga küm ka medendaktsütsü tenokdangba agütsüogo.
Congress MLA asem yagi Hombar anogo, budget session tenzük nü, Haryana Angh Kaptan Singh Solanki-i assembly nung jembiba o tezüluba nung aliba shiditem shisa-a entoktsü.
Congress MLA parnok 14 prongi state angh nem assembly nung o mejembidaktsütsü asoshi assembly telung aser tema ajak nung lungkak aita liasü.
Mongulbarnü parnoki assembly kima waku tanak amer aser tebang nung sü tanak mangumer, angh Solanki-i o mejembidaktsütsü lungka ait. Tesülen police-i parnok senshidaktsü.