Rabri Devi ajanga RSS uniform melentsüsa akum: Lalu Prasad

Patna (Bihar), March 15 (Agencies): Rashtriya Janata Dal (RJD) tongti, Lalu Prasad-i RSS-i khaki half pant nungi longpant melenbaji pa kinüngtsü, Rabri Devi ajanga lir, ta Hombarnü ashi.
Lalu-i, “Rabri Devi ajanga Rashtriya Swayamsewak Sangh-i uniform melentsüsa akum,” ta twitter ajanga ashi.
RSS aija Lalu-isa, “Ano onoki parnok half pant dangi meyipdaktsütsü,” ta ashi.
RJD leniri ashiba agi, ita ana tejaklen pa kinüngtsüi RSS süoshi indang jembia liasü, iba sülen RSS kanga jashiba ajanga parnoki half pant nungi long pant-i melentsü lemtet.
Taküm January ita nung Rabri Devi-i, “Lokti nung half pant asemtsü RSS-i maaker asü(?)” ta asüngdangba sülen BJP tongti lenir aikati la aija liasü.
Taoba ita BJP lenir aser taoba Bihar Deputy Chief Minister, Sushil Kumar Modi-i Rabri Devi aija, “La ya 19buba putu mulungsentsü aketba tetsür ka,” ta ashi.
Yashi Rajasthan, Nagapur nung RSS general secretary, Bhaiyyaji Joshi-i, “Onoki swayamsevaks süoshi melentsü atema lemtetogo. Onoki khaki half pant agi ali sentsü long pant melentsü,” ta metetdakja liasü.