Htin Kyaw-i Myanmar Tir tasenba akümtsü jenjang angur

Myanmar Tir tasenba, Htin Kyaw (Tiyongtsü) aser National League for Democracy (NLD) yimtenren telok lenila, Aung San Suu Kyi (Achijilen) nati Naypyitaw yimtiba nung parliament yimsüsürtemi Tir tasenba shimtsü election agiba sülen kimaleni ayazüka aludang agiba noksa ka yangi angur. (Naypyitaw, March 15)

Naypyitaw, March 15 (Agencies): Myanmar parliament yimsüsürtemi par Tir tasenba kümdaktsütsü asoshi National League for Democracy (NLD) yimtenren teloki parliament lower house nungi shimba Tir candidate, Htin Kyaw tanü vote agüja shimogo.
NLD telok lenila, Aung San Suu Kyi-i temulung lemtetba tembar, Kyaw-i tan Tir tasenba akümtsü jenjang anguba ya 1960s mapang nungi tenzüka tanü tashi nung mitkar lenisütsü menden mabener kati Myanmar Tir menden abentsü jenjang tan mezüngsüa angur lir.
Suu Kyi-i aniba NLD teloki yaküm November ita agiba linük election nung takok tulu ngua par telok kisüngi sorkar tasenba tentettsüsa jenjang tajung angu saka mitkartemi latetba linük temzüngi memelaba yong Suu Kyi-i Myanmar Tir menden abentsü temeten monguteti lir.
Ajisüaka, lar NLD telok nungi Tir tasenba shima, lai iba Tir tasenba ajanga lar Myanmar linük madak yimsü asütsü tenangzükba olen ka Suu Kyi-i metetdakja lir.
“Myanmar nüburtemi Suu Kyi meimba yong ni tanü election nung vote timba ngua Myanmar linük Tir tasenba akümtsü jenjang tajung nguogo,” ta Kyaw-ia metetdaktsü.
Tanü parliament yimsüsürtem rong nungi bendenba vote 652 nungi Kyaw-i vote 360 ngua Tir tasenba akümtsü jenjangji anguba osang jangjaogo.
Mitkar yimsüsürtemi yokba Tir candidate, tesüiba mitkar general, Myint Swe-i tanü vote 213 ngua tanabuba jenang anguba sülen 1 buba Tatong Tir akümtsü jenjang ajangzükogo.
NLD telokisa parliament upper house nungi shimba Tir candidate, Henry Van Thio-i tasembuba jenjang ngua 2 buba Tatong Tir akümtsü.
Tir tasenba, Kyaw-i par cabinet yimsüsürtem shimba sülen Tir Thein Sein nungi taruba April ita 1 nü Myanmar linük yimsüsütsü menden agizüktsü sentong renema lir.