Smriti Irani mapa nungi anentsü akhangba nung Kanhaiya-a aden

New Delhi, March 15 (Agencies) : Sorkar aser linük anema yimyim ayimba ken o nung aija pua alirtem Umar Khalid, Anirban Bhattacharya aser SAR Geelani nunger chiokang ta takhangba agüja Mongulbarnü JNU kaketshirtem Parliament tashi tetsüng agi jajaba sentong nung Jawaharlal Nehru University (JNU) Students’ Union Tir Kanhaiya Kumar-a dena liasü.
‘Azaadi’ atema lungkak aitba mapang kaketshirtemi Union Human Resource Development Minister Smriti Irani-a mapa nung anenjang ta takhangba agütsüogo.
“Onoki Smriti Irani mapa nungi anendaktsütsü, tai tongloktsüba ken o agientsü, pua aliba kaketshir ana chioktsü, university ka inyakyim menokdangtsü aser caste politics ozüng agientsü asoshi akhanger,” ta Kumar-i osangbener dang ashi.
JNU nung kanga dang temaba jejang nung telok kati kü dang Mongulbar nikongdang 5:00 ako tashi nung iba tatalokba dak sentakba nung temeten o tajung ka agüjang ta tetuyuba agütsüogo, ta Kanhaiya-isa osangbenertem dang ashi.
Longkak aitertemi Anirban Bhattacharya aser Umar Khalid na tepuokdak nungi chiokang ta shidi tapak tulu nung zülur JNU kima maloka yuja lir.
JNU nung temaba jenjang nung telok ka jagi kaketshir ana den Kanhaiya Kumar, Umar Khalid, aser Anirban Bhattacharya nunger dang khen atema iba inyakyim nungi pila alitsü tetuyuba agütsüogo.
Ajisüaka iba tetuyuba nung Vice Chancellor M Jagadesh Kumar aser Chief Proctor A Dimri nati kanga junga asadanga bushidangerang telemtetba ka agitsü, ta osang kar ajanga metetdaktsüogo.
Vice Chancellor-i anir University nung tekolaktem yashi, Hombarnü item osang benoka olemtep ka akaba sülen university ozüng aser inyakyim alema inyakba atema tai tonglokja alirtem, Kanhaiya aser Umar na dena kaketshir parnok nisung 21 dang nungi iba dak sentakba nung tememten o tajung ka agüjang ta tetuyuba agütsüogo.
Iba tentet ya parliament amaksang, Afzal Guru alenseta südaktsüba atema longkak aitba mapa bushisüngdangtsü asoshi February 10 nü nungi tentetba lir.
Kanhaiya, Umar aser Anirban nunger ya iba longkak aitba sentong nung linük anema yimyim ayimba tai tokloktsür pua ayu. Kanhaiya ya Tihar jail nungi March 3 nü bail nung chiokogo, ajisüaka Umar aser Anirban nabo ano tepuokdaksa lir.