Anogo pungunü Nagaland Budget session tenzükogo

Kohima, March 15 (TYO) : Anogo pungunü atema Nagaland Assembly budget session Mongulbar nungi tenzükba sentong nung Angh, P B Acharya-i o jembi.
Chief Minister, T R Zeliang kübok Democratic Alliance of Nagaland (DAN)-i aniba opposition maliba sorkar atema iba ya mezüngbuba budget session lir. T R Zeliang-i Finance portfolio repsema inyaker aser pai March 17 nü 2016-17 budget benoktsü.
Züngsem 60 agi akümba assembly nung yaküm November ita Congress MLA 8 NPF den loktep aser iba jagi opposition maliba sorkar ka aküm.
Tanü senden nung Chief Minister-i taoba Nagaland Angh (1984) asür General (Retd) K V Krishna Rao, aser taoba Sabha Speaker & Meghalaya MP asür Purno Agitok Sangma na asüba bilemteta tetushi agütsü.
Assembly Speaker, Chotisuh Sazo-isa asür L Nokzenketba, asür Lalkholam Kuki aser asür T Sakusangba Aier bilemteta tetushi agütsü.
Tanü senden nung adenertemi minute ana ola madoki tasür nem akhüm agüja liasü.
Iba sülen MLA Vikho-o Yhoshu-i Angh onük atema motion of thanks ashi aser ibaji MLA Namri Nchang-i pusema nungit.
March 17 aser 18 nung Angh onük dak sendakba olemtep alitsü.