NSCN-IM lennirtemi RN. Ravi den ajurutep

Dimapur, March 15 (TYO) : Mongulbarnü Delhi nung NSCN lennirtem Isak Chishi Swu aser Th. Muivah lenisüba kübok NSCN-i Indo-Naga peace talks interlocutor, RN. Ravi den ajurutepa Naga yimten tebilemtsü dak sendakba onüktem jembi, ta MIP-NSCN/GPRN sangdong ka nung metetdaktsü.
Iba senden nung Th. Muivah-i nüjiso atema mapa inyaker tejen Gen. (Rtd) Kholi tejak shiyutep aser Muivah-isa Gen. (Rtd) Kholi yimjung olemtep nung adenba atema kanga pelaba metetdaktsü.
RN. Ravi-ia Gen. (Rtd) Kholi yimjung olemtep nung adenba atema pela agizük aser yimjung atema Th. Muivah aser Isak Chishi Swu den longjemba atema pelaba metetdaktsü.
Naga nunger lennir tajungtem rongnung Th. Muivah ya ka lir aser Kholi-i pa den adentsü telemtetba agibaji kanga dang shitak agiogo, ta Ravi-isa metetdaktsü.
Gen. (Rtd) Kholi-ia o jembidang, aiben RN Ravi indang osang angashiaka tan mezüng pa den ajurutepba atema kanga pelar ta ashi.