Alempang Youth Association (AYA)-i MKG DC aitsür

Dimapur, March 15 (TYO) : Tawa school tem nung agütsüba Mid-day Meal jang nung mesen keta aliba osang Mokokchung Town Lanur Telungjem (MTLT)-i temai adoka metetdaktsüba dak sentakba nung Mokokchung Deputy Commissioner (DC)-i ashiba o angashia Alempang Youth Association (AYA) kanga aoksaogo, ta AYA Tir L. Imkong. Lkr aser Executive Chairman, Supong nati sangdong ka ajanga metetdaktsü.
Iba tatalokba nung DC-i kanga junga mebilemdangi langzü amai AYA-ibo bilemer aser ibaji ajanga pa sasa pa district ka tekolak asütsü metemsüi kümdaktsür koba ajanga ano nüngdak makaba nung nüburtem nem tangatetba tai agüja mashileni anir, ta AYA sangdong nungsa shia lir.
AYA mendenpurtemi ashiba agi, item aibelener dak kechi alang aji inyakdaktsütsü mechi nung MTLT-ibo parnoki teinyaktsü khuret ka ama bilema, iba tim masüba mapa District Mission Authority (DMA) nung mendenbuba nem metetdaktsü. Ajisüaka DC-i aibelenertem ang pusema meimbangtsür Indian Penal Code (IPC), Sec 441 kübok parnok temeten bushitsü tetuyuba agütsüba den Code of Criminal Procedure (CrPC) 1973 alitsü ang ozüng agütsü.
“Mapa tamajung atema iba ama telangzüba agütsüba ajanga tarutsü yimsüsübaren nung lenmang tajung lapokdima ? Iba mapa ya nüburtem mashileni aniba aser taitsütsü aketba inyakyim lir,” ta AYA-isa metetdaktsü.
Mokokchung jila nung aliba nüburtem ajungtsü asoshi inyaker telok ka shitak teinyaktsü ka ama bilema MTLT-i inyakba nung AYA-ia nungita metentsür. MTLT-i inyakba mapa dang ‘temelaba mali mita aoba mapa’ ta ajabaji temenünütsüka aser tamendakdak maliba o lir.
MTLT dang jang nung mesen keta aliba lemtsür ta osang ashiba sülen nübur tajangzük angutsü atema inyaker tentet ka ama, parnokia iba kuli kanga kümdanga aser mapang entoka bushir asütsü kechiba süra osang ka agütsütsüji kanga junga bushisüngdanga jangjarang agütsütsü nüngdak.
Nüburtem mashileni ania nüngdak makaba nung tatadaktsüba aser nübur asoshi bilema shitak inyaker tentet ka rajang kümdaktsütsü merangba, iba ama yimsüsür kümdangshitsü metetdaktsür, ta AYA-isa ashi.