Kma & Mkg nung National Rural Drinking Water & Sanitation Awareness Week tenzük

Dimapur, March 16 (TYO) : March 16, 2016 nü PHED Conference Hall nung National Rural Drinking Water & Sanitation Awareness Week tenzük.
Iba sentong nung tongti tesemdangerji PHE Minister, Tokheho Yepthomi liasü aser Ministry of Drinking Water & Sanitation-i India ajungalen iba sentong ayongzüka amunger.
Tzü aser merükmejudak facility yangluba kija jagi meperir, saka item facility tem timi aanga amshiba aser anogoshia tzü kümdanga amshitsü osang metetdaktsütsüla, ta tanü sentong nung Tokheho-i tongti tesemdanger o jembidang ashi.
Paisa, arem-min wazüka ayutsü atema onük jembidang, tzünglu marura tzü bendena ayutsü lenmang kecha mali ta ashi .
Centre nungi senotsü peria mangur saka department-i 2019 tashi nung nübor ajak nem tzü tajemtsü aser total sanitation alizüng tonga inyaktsü merangtsü, ta PHED minister-isa metetdaktsü.
Sentong nung I&PR Parliamentary Secretary, Khekaho Assumi-ia o tatsüka jembidang PHED-i tawa mapa tajung inyakba atema tenüngsang agütsü.
National Rural Drinking Water & Sanitation Awareness Week tenzükba sentong nung mendenji Secretary, PHED Anenla S. Longchari (IAS) liasü, Chief Engineer, PHED, Er. Kevisekho Kruse-i okila jembi aser Director WSSO, PHED, Er. K. Ghushito Sumi-i anküp tepela o jembi. Sentong nung Deputy Speaker, NLA Imtikumzuk aser Parliamentary Secretary, Art & Culture, E. Eshak Konyak na aden.
Mokokchung nunga Longkumer Kilem nung National Rural Drinking Water and Sanitation Awareness Campaign tenzükba sentong ayongzüka agi.
Iba sentong nung tetushi süa jaokerji Mokokchung Deputy Commissioner, Sushil Kumar Patel liasü aser pai sentong nung adener ajaki Brand Ambassador ama nübortem dang tzü aangtsü indang osang prokshitsü ayongzük.
Sentong nung Executive Engineer, N.Yanger Pongen-i okila jembidang, iba campaign ya kilen ajak nung metsümeshidak yanglutsü, yimtsüng merükmejua ayutsü, tzü tajemtsü aser tzü aangtsü indang osang prokshitsü atema lir, ta ashi.
March 16 nungi 22, 2016 tashi agiba sentong nung Kobulong Sub-Division kübok school tanurtem asoshi essay tetoktepba ka ayongzüka agitsü.