Linük anemer tamajungtibaji BJP lir: Arvind Kejriwal

New Delhi, March 16 (Agencies): Bodhbarnü Delhi Chief Minister, Arvind Kejriwal-i, linük anemer tamajungtibaji BJP lir ta ashiba den külemi pai, JNU nung India anema yimyim ayimertem parnoki kümzüka ayur, ta tai tongloktsüogo.
Iba osang nung ajemdaker tanep New Delhi nung AAP tongti lenir aser Delhi CM, Kejriwal-i, “BJP ya linük anemer tamajungtiba lir. Kechiba parnoki linük anema yimyim ayimertem kümzüka ayur (?)” ta asüngdang.
JNU indang bushisüngdangba luden kati, February 9 nü JNU campus nung sentong ka alidang linük anema yimyim ayimertemji JNU kaketshirtem masü saka tangar telok ka lir ta metetdaktsüba sülen Kejriwal-i BJP nem iba tai tongloktsüogo.
February 29 nü Hyderabad Police-i Kejriwal anema linük anemba indang FIR ka benokba sülen Kejriwal-i, “Ato kilonser Narendra Modi dang nungibo ni linük temeimba,” ta jembia liasü.
Jammu & Kashmir nung BJP aser PDP na teloktep lir, aser iba dak sentakba nung tanü Kejriwal-i, JNU ken o nung chichiba linük anemertem apuba ajanga BJP-i PDP tongti, Mehbooba Mufti majashidaktsüner, ta aitsü.
Paisa, JNU campus nung India anema yimyim ayimertemji Kashmir nungi lir ta ashi.