Kohima Science College Students Union küm 50 jungogo

Kohima, March 16 (TYO): March 16, 2016 nü Kohima Science College Students’ Union küm 50 ajungba nüngtem nung sentong ka ayongzüka agi.
Iba sentong ya College Auditorium nung agi aser tongti tesemdangerji Chief Minister T. R Zeliang liasü.
Asür APJ Abdul Kalam-i Nagaland semdangdang ‘Tanur ajaki mangdang tulu ayutsüla’ ta ashiba olen bilemteta tanü TR Zeliang-i kaketshirtemi mangdang ayutsü aser iba jagi ajungmesodaktsütsü indang jembi.
“Asen tebilembatem ajanga asenok ajungmesotsüla” ta pai ashi. Chief minister-isa college ketdangsertem aser kaketshirtem dang college indang omen nungi mepilatsü ayongzük.
Küm 50 tashi KSC Students’ Union-i tashi anga aruba aser college jenjang tajungba kümdaktsüba atema TR Zeliang-i tenüngsang agütsü.
2014 nung UGC-i KSC nem Autonomous College Status agütsüba atema paisa college nem tenüngsang agütsü aser maneni tajungtiba akümtsü merangang ta ayongzük.
Sentong nung KSC Principal, Dr. I Anungla Aier-i tesentepertem pela agizüka jembidang ashiba agi, KSC kishizüng adenertem aser parnoki iba reju tajungba yangerba nung shilem agiba atema KSCSU indang Hon Jubilee benjung amunger.
NE tesem nung NAAC-i A Grade agütsüba reju ana dang lir aser ana rongnung KSC ka lir. KSC nung taruba academic session nungi Botany, Zoology, Mathematics, Physics, Geology aser Anthropology atema discipline trok Masters Degrees atema NAAC indang program tenzüktsü aser ano National framework of Undergraduate Programme tenzüktsü sentong lir, ta Dr. I Anungla Aier-isa metetdaktsü.
Agriculture Parliamentary Secretary, Dr. Benjongliba Aier 1973-75 nung iba college nung azüng aser tanü sentong nung pai o jembidang, pa KSC nung kaketshir ka asüdang kaketshisatsü angazükba dang masü saka KSC Evangelical Union ajanga tanela tsütsü tangazükba aika angu, ta ashi.
Sentong nungsa, Dr. N R Newmai aser ADC Pughoboto & KSC alumni association general secretary, Avelü Rüho nati o jembi aser NSF tir Subenthung Kithan, ANSCU tir Zhoku Theluo aser Jotsoma SU tir Rokophrezo Rino nungeri yokba osang zünga metetdaktsü.
Hon Jubileemung nüngtem nung Alumni-i sen lakh 3 jubilee trust fund ka tenzük aser iba sen ya kaketshirtem atema amshitsü. Iba jubilee trust fund atema chief minister-ia sen lakh 2 tenla agütsü.
Sentong nungsa Higher Education Parliamentary Secretary, Deo Nukhu-i Jubilee souvenir ‘Odyssey’ sayatsü.
Nagaland nung tang teinyakdak MLA 60 rongnungi parnok 10 bo Kohima Science College, Jotsoma nung azüngertem lir.
KSCSU general secretary Melite Wetsa-i Kohima Science College ali atsünga agiba dak sendakba nung, Nagaland sorkar aser Jotsoma Village Council tsüngda angatetteptsü mepishia metetdaktsü.