Brussels: EU minister-temi tashishitsü aketba refuge onük benoker

Brussels, March 17 (Agencies): European Union (EU) lenirtemi Belgium yimtiba, Brussels nung tan Brehostibar aser Hokolbar nü na agia senden mena Turkey den sentakba tashishitsü aketba refugee onük benoka jembiba osang jangjaogo.

Tan senden nung shilem agirtemi EU anüdoklen tsütsülen tentetba linüktemi refugee nisungtem mesüba ajanga ajurushiba rongsenren timtem ajemtsütsü nükjidong nung item linüktem nung jenoka alir refugee nisung meyirijang jenti Turkey linüki yoktsü onük benoka jembitsü tenzüker lir.

Turkey-i mejangjatetba refugee nisung agizükba shia, EU-ia Turkey nungi Syria nunger refugee ka agizüktsü tezüngzüktep ya EU aser Turkey nati tawa agi saka tan amenba Brussels senden nung ang iba tezüngzüktep tatem küma agizüktsü mesüra kasaji magizüktsü lemtettsü sentong lir.

Ajisüaka, EU nung züngsemba linük aikati tan tatem küma agitsü renemba tezüngzüktepji agizüktsü memulungi aliba osang jangjaogo.

Ano, tan tezüngzüktepji asangsang nung agizüktepra, Turkey-i tarutsü mapang nung EU nung züngsemtsü maongka angutsü akok.

“Tan EU-Turkey tezüngzüktep agiba ajanga Europe-i refugee nisungtem sendoktsü bilemer masü. Ajisüaka, ozüng alema nisung shibelenbaren nokdangtsü nükjidong nung tan tezüngzüktep agitsü maparen tenzüker lir,” ta EU nung First Vice President, Frans Timmermans-i osang jangjashitsü.