Greece nung migrant nisung mn 1 dak tema jenoka lir: UNHCR

Geneva, March 17 (Agencies): Yaküm, 2015 küm January ita nungi tenzüka tanü tashi nung pei talidak toktsür migrant nisung million 1 dak tema Greece linük nung jenokba osang ka United Nations High Commissioner for Refugees (UNHCR)-i metetdaktsüogo.

“2015 küm tetenzüklen nungi tenzüka tanü tashi nung Syria, Iraq aser Afghanistan toktsür refugee nisung million 1 dak tema Greece nung jenoka aliba osang bushitetogo,” ta UNHCR-i ashi.

Ano, taküm, 2016 küm tenzüker tanü tashi nung refugee nisung 143,000 dak temai Turkey toktsür Greece nung jenoka aliba osanga bushitetogo.

“Greece densema, Europe kübok densemba tesem balala nung refugee nisung meyirijang jenti jenoktsü tenzüka lir aser iba yongji, Europe ajungai refugee nisungtem jenoka lidaktsütsü maparen amalitepa inyaktsü nungdaka kümogo,” ta par teloki ajungshia ashi.

Syria nung tan hopta nungi tenzüka küm 6 buba tashi tongpang kanga sashia raratepba ajanga Syria nüburtemi pei talidak toktsür Europe nung jenoka alitsü tenzükba osang bushiteta lir aser ibaji ajanga tesüiba World War II tongpang mapang sülenbo Europe-i refugee nisungtem den sentakba khuret tulutiba tang ajurutsü tenzükogo.