Myanmar puti otsü tasen ka tenzükogo

Myanmar Tir inyaktsü atema U Htin Kyaw shimbaji par linük puti otsü nung kanga dang tongtibang tatalokba ka lir. 1962 küm Myanmar nung mitkartemi sorkar tashi abenba sülen Htin Kyaw-i aniba sorkarji loktiyimten inyakyim nung tentetba sorkar mezüng asütsü. Mitkari yimsü asüba mapang general temi kanga dang tashiyim aser ambangyima yimsü asü aser iba mapang parnoki nübor nem temeten magütsü aser par linük alima den tesentaktep melii aküm. Myanmar nung loktiyimten pusemertem atema tan election ya takok tulu ka lir aser pelatepba mapang ka lir, kechiyong ozüngi melaba sorkar ka tentetogo, saka ano külen parnok lennir Aung San Suu Kyi-i Tir meinyaktetba atema parnok temulung mepelar. Mitkartemi linük yimsü asüba mapang Linük Temzüng nung ozüng ka yangluba ajanga Suu Kyi-i Tir meinyaktettsüsa akümer. Lar chirtemji bendanger asüba onük nung ajemdaker lai Tir mapa meinyakteter. Lai aniba National League for Democracy (NLD) dak Linük Temzüng reprangshimtsü atema tashi mali. Taoba mapang Suu Kyi-i mitkar tanishirtem den tangatettep kati arutsü atema merangdangogo saka iba nung lai takok mongutet. Iba nungji ajemdaker lai Htin Kyaw Tir inyaktsü atema tenüng jateta shim. Htin Kyaw ya Economist aser kaketzülur ka lir aser Suu Kyi tena ya tanur asüdang nungi metettepa ainba lir. Htin shimba telemtetba ajanga Suu Kyi-i Linük Temzüng ajanga tetsükdaktsü liaka, laisa sorkar ketdangsütsü ta asüba sayur. Loktiyimten ajanga tentetba sorkari ji Myanmar linük tejakleni aoba tamaitsü sayur saka sorkar tasenba atema teinyaktsü khuret aika lir. Asia nung sensaktiba linüktem rongnung Myanmar ya ka lir aser iba asoshi sorkari rongsenkettsüng tsütsü inyaktsü wadang tulu lir. Mitkari sorkar yimsü asüba mapang linük rongsenkettsüng jenjang kanga mejungi aküm aser ibaji shia arudaktsütsüba mapaji kanga tasak asütsü. Iba nungji Myanmar-i parnok meketa aliba linüktem aser ano alima teyari nüngdaktsü. Mitkar tanishirtemi yimtenren mapa civilian ket nung agütsü nunga Myanmar indang reju aika nung mitkartem tashi lir. Parliament House anaprongla nung menden shilem pezüsü nungi kabo mitkar asoshi wazüka lir. Iba ya ajanga mitkar temelaba magii Linük Temzüng reprangshitsü tashi mangur. Ano, mitkartem ket nung Ministry tongti asem- defence, home affairs aser border affairs lir aser parnoki item ministry ketdangsür. Mitkartemi tawa inyakba mapa ana ajanga parnoki linük nung reju ajak benzüka agütsütsü temulungtetba mali ta sayur. Mezüngbubaji Suu Kyi nem Tir menden magütsüba lir. Suu Kyi ji Myanmar nung kanga dang nüngtugu lennir ka aser ano alimai akhümtsübuba nisung ka ta mitkari meteta lir. La Tir inyakdaktsüra, linükji full democracy ka akümtsü ta parnoki meteta lir. Tanabubaji, mitkari ashishitep aketba retired general Myint Swe tatong tir asütsü shimba ajanga, parnoki sorkar yimsüsüba nungi mepilatsü ta sayur. Myint Swe ya taoba sorkar mapang inyakogo. Ajisüaka yaküm November elections sülen osangtajung kaji yimsüsüba mendenji democracy pusemertem keti tuluba aruba lir. Suu Kyi aser Tir Htin Kyaw nati Myanmar ji full democracy linük ka kümdaktsütsü nükjidong yur kanga dang kümdanga sorkar ketdang asütsü nüngdaker.