March 19 nü state nung ‘Earth Hour’ agitsü

Dimapur, March 17 (TYO): Alima ajaklen sorkartemi ghonda ka light shibangtsü aser iba den kasa state nunga Honibar, March 19, 2016 aonung 8:30 ako nungi 9:30 ako tashi ‘Earth Hour’ agitsü, anungji alima tsüngsang-mopung melenshiba nungi alima kumzüktsü pusema iba mapang nung light shibangtsü atema New & Renewable Energy Department-i mepishiogo.
Sangdong ka ajanga NRE Director, Er. T.S.Angami-i, alima tsüngsang-mopung melenshiba ya tongtibangsüa petroleum products, fossil fuels ama atsükba ajanga greenhouse gases (GHGs) adokdaktsüba agi lir, ta ashi.
Paisa, tanü asenok ki timba ka nung atsükba electricity ya thermal power plants nung nagmati aser diesel ama fossil fuels arongba ajanga lir. Item ama gas adokdaktsüba ajanga alima tali tatsükba kümdaktsür, koba ajanga tsüngsang-mopung melenshir, aser iba ya tanü alimai ajurushiba tayongzükba tulutiba rongnung ka lir.
Iba dak sentakba nung Department-i, alima kümzüktsü pusema ghonda ka light shibangtsüla koba ajanga Climate Change ajema kümdaktsüba nung shilem agitsü ta mepishia metetdaktsüogo.
Nagaland sorkar tenüng nung NRE Department-isa GHGs adokdaktsüba ajema akümtsü maparen pusema pei kidang, office aser tanga tesemtem nung menüngdakba light tem shibangtsü mepishia metetdaktsüogo.