Musharraf-i Dubai yimti bushia ogo

Islamabad, March 18 (Agencies): Tesüiba Pakistan mitkar lenisang, Pervez Musharraf-i pa anema benokba bendanglen mesenzütsü tenokdangbaren agienba sülen par Pakistan linük toktsüba osang jangjaogo.

Pakistan nung tentetba Supreme Court-i Musharraf anema benokba tenokdangbaren agientsü tuyuba sülen Musharraf-i United Arab Emirates (UAE) kübok Dubai yimti bushia tanü, Hokolbar nü ao.

“Musharraf-i bendangleni oa küm 10 tejaklen nungi tenzüka benokba tashidak den sentakba taneptsü bushiba sülen  Pakistan-i tanaben shilanga pa anema okadak benokba ken o angadangba sentongtem nung shilem agitsü nangzükogo,” ta Pakistan nung adokba Dawn osangkaketi sangdongogo.

Ajisüaka, “Musharraf anema benokba ken o tem angadangba ajanga Pakistan sorkari khuret jenti ajurutsü aser Pakistan mitkartemia nüma medangtettsüa tensa ajurutsü akok,” ta shia, Musharraf-i par Pakistan-i tanaben meyipa marutsü akokba olen ka Pakistan yimtenren tensa tendanger mongin, Hasan Askari-i temulung malemba olen ka metetdaktsüogo.