ANCSU-i akhangba onük 3 nungi masetshir

Dimapur, March 18 (TYO) : ANCSU-i küm ana tashi nenshia khangyonga aruba sülen sorkari Technical Education Department anema mapa inyaktsü mulunga agizükogo aser iba dak sendakba nung telemtetba kar agiogo, ta ANCSU sangdong ka nung metetdaktsü.

Higher Education den Technical Education Department lokteptsü asalentong asütsü atema sorkari luden ka tentetogo, sorkari Technical Education Department nung mapa timi meinyakba ketdangsertem nem show cause notice agütsüogo aser state reserved seats atema telatetba tasen agütsüogo, ta ANCSU Tir, Zhoku Thulou aser tongti tezülur Benjong Longchar nati sangdong nung shia lir.

Sorkari Higher Education den Technical Education Department lokteptsü asoshi inyakba mapa nung ANCSU-i teyari agütsütsü aser ano aibelena aliba ketdangsertem dak disciplinary action agiba kanga junga repranga atatsü, saka seat reserved quota indang tetuyuba jibo ANCSU-i magizüker, ta mendenpurtemi metetdaktsü.

Iba onük atema onoki kaketshir teloktem aser onok pusema yarirtem den mezüng asüngdangyatsü aser iba sülen onoki taruba lungkak aitba inyakyim metetdaktsütsü. March 18, 2016 nü NSF Conference Hall nung rongdak presidential council senden ka jatepa amen aser iba nung ANCSU-i akhangba onük asem nungi masetshitsü telemtetba agi, ta ANCSU Tir aser tongti tezülurisa metetdaktsü