NLA-i 2015-16 atema SDG sen crore 850.64 agizük

Backward Tribes Commission Bill aser Online Games of Skill Bill agizük

 March 18, 2016 nü Chief Minister, TR Zeliang-i assembly session nung 2016-2017 budget atema jembidang agiba noksa angur.

Kohima, March 18 (TYO) : Nagaland Legislative Assembly-i Hokolbarnü 2015-16 atema Rs. 850,64,74,000 Supplementary Demands for Grants ama agizük.

Iba bill ya voice vote ajanga agizük aser supplementary demands for grants ji sorkar department 82 atema lir. Chief Minister-i T R Zeliang-i Finance Portfolio amsema inyaker aser yashi pai iba Bill assembly nung benoka liasü.

Ano, Nagaland nung backward kintem temeten wazüka ayutsü atema commission ka tentettsü asoshi state assembly-i Nagaland Backward Tribes Commission Bill 2016 agizükogo.

Commission jagi Longleng, Kiphire, Mon aser Tuensang district tem nungi Eastern Nagaland kin trok- Chang, Khimaniungan, Konyak, Phom, Sangtam aser Yimchungru atema inyaktsü.

Iba bill ya Chief Minister TR Zeliang-i yashi benok aser voice vote ajanga agizük.

Nagaland nung backward kintem temeten wazüka ayutsü, mapa nung shilem mekazüka yutsütsü aser parnok terenlok, shisaliok, mapa anguba aser temang anema alibaren ajak asoshi inyaktsü ta chief minister-i bill benokdang ashi.

State sorkari Nagaland Backward Tribes Commission ta ser telok ka tentettsü aser iba telok yagi educational, employment & health dak sendakba onüktem reprangdanga shisadanga tebilemba ashitsü.

Eastern Naga Students’ Federation-i tezüluba ka nung parnok taginüba agütsüba nung ajemdaker iba bill renem. Sorkar department aika nung shilem 25 wazüka yutsüba inyakyim timi meinyaker ta ENSF-i aitsür, ta Chief Minister-i metetdaktsü.

Iba Commission-isa Nagaland nung tanga backward tribe tem indang khurettem atema inyaktsü, ta paisa shisem.

Ano, tanü Assembly nung Nagaland Prohibition of Gambling and Regulation of Online Games of Skill Bill, 2015 agizükogo. Iba bill ya July 23, 2015 nü Chief minister-i benoka liasü.