Birth control mozü agi temokok tezü nung yarir

New York, March 19 (Agencies) : Birth control mozü achir tetsürtem dak estrogen tasazük shitak alir aser ibaji ajanga temokok anguayangtsü aliba nungi kümzüker, ta scientist temi putetogo.
Iba mozü achir tetsür arishi küm 15 aser 19 tsüngda purtem, parnok 23,428 dak tendanga reprangdangba sülen scientist temi birth control mozü achiba ajanga temokok telung nung tezü yiruba, ‘anterior cruciate ligament (ACL)’ kanga junga anepdaktsür aser ibaji ajanga operation agitsü nungi kümzüker ta putet.
“Birth control mozü süngjang yagi temang nung estrogen tali aliba ajemdakja temangi nüngdakba shitak dang yutsür aser ibaji ajanga ACL agi timtemtsü aliba nungi jenbodaktsür,” ta University of Texas Medical Branch, Galveston, US nungi iba bushisüngdang nung lenir Aaron Gray-i ashi.
ACL ya temokok azüklen o tsünglanglen na sentaktepba tezü ka lir. Asemteper mesüra asayar ka dak iba tezü nung timtem adokra pa taküm telemta akümer. Iba den külemi iba tezü nung timtem khen adokaji taküm piyong okronger kechiba süra iba tashidak agi nisung ka junga mejajatetdaktsür aser tezü tanga tem nunga timtem agütsür.
“Item temetetsütem temulung nung yur onoki iba bushisüngdang agia liasü,” ta Gary-i ashi.
Iba tongutetba ya ‘Medicine & Science in Sports & Exercise’ kaket nung adoktsüogo.
Tetsürtem dak aliba estrogen ajanga ACL yirutsüba nung shilem tulu agir, ta iba bushisüngdang sülen scientist temi ashi.
“Saisapong nung shilem agir tetsürtemi parnok ita shilem ajema odaktsütsü mesüra ita shilem aoba kanga junga jangja metettsü atema tang birth control mozü kanga bulua chiteper,” ta Gary-i ashi.