Palm Sunday

~  L.Kika Pongener Aoyimkum,Dimapur.

Lai- Mathi-21:1-11;Mark-11:1-10;Luke-19:28-40 Yohan-12:12-19.
T.Ken-118:25-26. Zekaria-9:9.
Palm Sunday Ratet : Palistine lima nung kanga bulua aliba asang süngdong iba tu ya  tereprangtsü nung tekabu amai lir. Otsü agi ashiba agi iba putu mapang nung parnoki benshiba (Tradition) kaji kodang nisung kari mapa kar nung takok ngudir iba asang süngdong indang tou ya senpet amai-sa agütsü. Mesüra kodang lenir tajung kar pelaa agizükdir tanü putu nung asenoki narozük agütsüba amai iba Palm leaves ya agütsü. Parnoki Palm leaves ya takok anguba aser tepela temaitsü nung amshi (Palm leaves- “The symbol of joy and victory “). Yisu Yirusalemi takok ngua aiba anogo nunga telok tulu adenshir kari pei sü lenmang nung lemtsü, sü makari süngo-tou lemtsü aser iba Palm leaves ya ammer Hosana, Hosana ta ayimdena agizük. Iba jagi Palm leaves lemtsür iba tou ya ammer tushia agizükba ajanga iba anogo dang Palm Sunday ta ajar südi ta rajema angateter.
Gado : Otsü-i ashiba agi iba putu tensa nung parnoki benshiba (Tradition) kaji chuba yimli o chuba yimli tsüngda nung osang-tsüsang tongtepratepdang kodang osang abenerji kor nung sanger arua ngudir ibaji rara osang ta takzüa liasü. Kodang shidi rongdong (Chariot) nung mener telok tulu sena ngudir nisung kar chuba mendeni atuba tetushi temaitsü ta takzüa liasü. Aser kodang Gado dak sanger arua ngudir ibaji yimjung osang ta takzüa liasü. Kechiaser Gado ya shiruru rongnung ajemalu shiruru ka lir. Palistine lima nung iba Gado ya khu abentsü aser nisung amentsü atema kanga bulua amshiba  shiruru ka lir. Yisu tetsü Mary -a  Gado ka nung mener tenüng zülutsü atema Bethlehem yimti bushia ao.
Tanü tatalokbatem : Yisu aser pa nütsüngtem-a Yirusalem nung kümtettsü Benjong amungtsü asoshi Bethani yimdak Mary, Martha aser Lazar par kidang anen ta otsü zülurtemi ashir. Bethany yim ya Yirusalem nungi mile ana shi pilar yim tila ka lir. Iba yimdak Lazar kidang ya Yisu teti ainlen senzüdang anena liasü ta otsü zülurtemi ashir.
Tanep yakta züngia Yisui nutsüng ana Bethfage ta ajaba yim ka Yirusalem nungi Yirukoi aoba lenmang nung aliba yim-i yok. Oang aser Gado ka kodanga nisungi memendangba techanu den sendaka angutsü aji salazüka bener arung ta ashi. Aser kari langka asüngdangra Kibuba asoshi tenüngdaktsü ta shiang. Aser nütsüng anaji Yisui ashiba ama orr Gadoji anir aru.
Yisu aser nütsüngtem kodang Bethani nungi apusoa Yirusalem tonga ao lokti tulu adenshir Hosana, Hosana Kibuba tenüng nung shiba arur pa sangang ta ayimdena tushia agizük. Aser kari pei sü luzüka lenmang nung lemtsü, kari asang kongsang kozüka lemtsü aser iba asang tou ammer tushia lokti tulu sena Yisu sülen anidak.
Iba lokti tulu pa sülen anidakertem ajungaji pa meimertem dangbo masü. Nisung kar pai sayatenya mapa inyakba reprangtsü anidak, kar pa tushia agizüktsü anidak aser Farise aser sadukitembo pa tai aputsü kuli bushia anidak. “Ajiang nenoki kecha makümtsü, alima pa sülen ogo” (Yohan-12:19). Farise nütsüng kari ashi Kibuba nai item ya arüjang. Saka Yisui langzü “Itemi mokorai lira longtem jagi ayimtentsü ” (Luke-19:39-40).
Kechiaser item tatalokbatem ajunga ya nisung meimchir sentong masü saka küm noklang aika tejakdang ainkartemi shinzüka toktsüba ataloker.
Palm Sunday nung tatalokbatem nungi Tanela lesson kar :
1.    Tsüngrem sentong kechi tataloktsü shinzüka ali, ibaji alima yimya tashi kecha agia nokdangtsü mesura soita ayutsü makok ta tatalokba mapatem jagi kuli sayur. Kechiaser tanep atalokba ya jilia renemzüka yanglua ayuba sentong ka masü. Gadoji-a jilia kibur den jembitepa ayuba ka masü, lokti tulujia jilia ayimzüka ayuba sentong masü.
2.    Yisu amenba Gadoji kodanga nisungi memendangba Gado ka liasü. Ajioda Yisu  Khristai shirnok taküm temenen memenai asüngteta merükteta meshiteta lidir parnok dakji dang alitsü akok ta kuli sayur.
3.    Shiruru rongnung Gado ya ajemalu, pa dak tangar yirutsütsü jakla maket, pai tangar den kodanga merarar, Kiburi khu kechi benloktsüdir ola madoki tashi angaa bener anidakba shiruru ka lir. Ajioda shirnok Gado ama tila küma ajemalu mulongsentsü dener tashi angaa taküm lidir parnok taküm nungji Yisu aita alir ta kuli sayur.
4.     Yisu Gado dak sanger Yirusalemi aibaji Paji yimjung chuba chir ta kuli sayurba liasü.
5.     Telokti rongnung takartemi pei sü luzüka lemtsü, sü makartemi asang kosang kozüka lemtsü aser iba manung Yisu amenba Gado jajadaktsü. Shirnoki pei akaba tajungtiba agi Yisu dang tenlar, ajioda taküm temulongjang ajunga Yisu nem bendanga agütsür yamala taküm denji Yisui jajanür ta sayur.
6.    Lokti tulu Yisu sülen anidakba rongnung karbo tai aputsü mulongsentsü dener anidak, kar pei tashidak anepnüyong anidak, kar pai sayatenya mapa inyakba reprangtsü anidak.
Temeim amangbapurtem, arung tanü Palm Sunday anogo nungi na aser ni Gado ama ajemalua tila kümer Yisu Khrista asen taküm nung kibur südaktsüdi. Na aser ni Yisu asen mulongjang nung aita litettsüsa asüngteta merükteta meshiteta temenen nungi pilaa lidi. Na aser ni akaba tajungtiba Yisu nem agütsüdi, na aser ni akaba tajungtiba agi arogo, yimden aser lokti nung shilem agidi. Na aser ni yimjung osang abener aser yimjung yanglur ka südi. Tsüngremi iba o azünger ajak moajangma.