Vijay Mallya aser Kanhaiya Kumar

India nung noksa ana- Gari aika den kiojen aika alisang aser Tipu Sultan indang noklang nok alizüktsü atema sen crore 1.5 agütsütsü nangzükba takarsang Vijay Mallya, aser Bihar nungi aluyimer aser anganwadi worker ka jabaso Kanhaiya Kumar. Mallya-i bank nem sen crore 9,000 agütsütsü sentsüh lir saka sorkari pa dang kecha meshiteter aser külen Kanhaiya amala sensaker kaketshir dak saru agütsür indang sen meindoktsüla ta takartemi kanga sashia jembir. Kanhaiya-i India loktiliba nung telemsa, sensak tia aser kijatemi rongsenren ketdangsüba ammetba nungi nüjiso atema takhangba agütsür aser külen Mallya-i pa akaba rongsen jaksajaklema sayur. Mallya ama takar nisung kati Kanhaiya atema mapa kar inyaktsü lir, kechiyong India nung Kanhaiya mesükba nisung aika lir saka Mallya ama nisungtembo ishika dang. Mallya-i pa indang rongsen jagi linük tenzüktsüla aser loktiyimten dak ajemdaker tentetba loktiliba ka kümdaktsütsü asoshi merangtsüla. Tawa tu RBI governor Raghuram Rajan-i ‘India nung takartemi bank tem nung sentsüh aika liaka, tasoba anogomung nung sen jenti endoka mungtepba ajanga parnoki sentsühji hau ta mezüngokba sayur’ ta metetdaktsü. Ano küm ter tejakdang Prime Minister Manmohan Singh-i industrialist tem dang pei libaliro azüoktsü aser sensakertem yaritsü aser tenlatsü atema mepishia ayongzüka liasü. Ajisüaka, iba sülen Laxmi Mittal-i par jala kiyimba benjungmung nung sen crore 200 den tema endok, Sahara wedding nung sen crore 500 den timba endok aser ano takartem US nunger sen billion 2 alangba ki nung alir. India nung economist Pranab Bardhan-i ashiba agi, “Billionaire kari sensaker nem sorkari senotsü teyari agütsüba atema nemnemer, saka sorkari parnok asoshia ‘corporate tax exemptions’ lir aser itemji asadangra sensaker nem food subsidies, fertilizer subsidies aser MNREGA agütsüba dang nungi kanga agi timba adoker.” India nunger sen aika bendang linüktem nungi ozüng alema bener oa rizünga yua lir saka item takartem ozüng kübok maitdaktsüteti lir, saka külen kaketshir kari nüjiso atema yimyim ayimba atemabo linük anemertem ta tai tonglokja merenshir. France nunger economist Thomas Piketty-i züluba kaket nung kijai rongsenren ketdangsüba nung tashi aliba ajanga terenlok masü saka lokti nung tebendangang tali adokdaktsür, ta shia lir. Kanhaiya Kumar-i iba tebendang anema ola adoker aser Mallya amala takartem tsüngdang kechiba lanurtemi ola madoktsü. Hao saru agütsürtem indang sen jagi Kanhaiya amala kaketshirtem shisaluyimba nung yaritsü akok saka iba sen jagi kaketshirji malizüktettsü. Bill aser Melinda Gates nati tena rongsen noklang nung shilem 95 tenla agütsütsü atema sentong lir. Warren Buffet-ia noklang nung shilem 99 agütsütsü nangzükogo aser tawa tu Mark Zuckerberg-ia par jala asoba nüngtem nung $45 billion tenlatsü nangzük. Ajisüaka, India nunger takartem- Tata, Azim Premji, Murthy aser Nilekani nungertemibo alima dang parnok taküm jangratema aliba jaksajaklema sayuba dak alaka sensaksertem yaritsü atema tenla magütsür. India nung takartem takaba küma ora aser linük ketdangsübaren ajanga parnok mazüoktetra; India-i nisung kar atema dang inyakra; ‘nüjiso’ indang ola tuluba adoktsü. Linük anemertem ta aija sorkari lanurtem tebang nembangtsütsü merangtsü, saka Vijay Mallya ama takartem ali tashi, Kanhaiya Kumar ama lanurtem maneni adoktsü.