‘Smart umbrella’ agi tzünglu alutsü malutsü shitettsü

London, March 21 (Agencies) : France nung aliba company kati ‘smart umbrella’ ka yangluteta lir aser iba anüshiji smartphone app ka den kodang sentaktepdir tsüngsang mopung arutsü tetzütetba dang masü saka nai amtoker aodanga nü phone nung osang agütsür.

Iba smart umbrella dang ‘Oombrella’ ta ajar aser iba anüshi nung mopung tashi, temperature aser light metetba sensor aika aliba capsule ka enoka lir.

Anungji iba capsule ji ajanga taruba minute 15 nung tzü mopung melenshitsü aliba shiteter aser iba osangji anüshi o smartphone nung aliba app na Bluetooth ajanga sentaktepa ajanga meteter.

Iba inyakyim jagi tsüngsang mopung osang yuteter. Iba den külemi iba anüshi temalen camera-a amshiteter. Iba capsule nungji light remshia ola atokba ka lir aser ibaji ajanga phone call aruba meteter.

Anüshi longa aliba merang melena synthetic fibre, Kevlar enoka lir, ta ‘TechTimes’ osang ajanga metetdaktsü.

Oombrella yanglutetba company, Wezzoo-i ashiba agi, iba anüshi yagi yipru mopung, rur alaba aser rur yipru nungi kümzütsü.

Anüshi tamtsü yintong ji tzümaitba (waterproof), ergonomic design nung yanglu aser ibaji ajanga tamtsü kanga anisüngzük aser tzünglu aludang tzü agi mela meraksar.

Iba anüshi indang sü ji sentsü aketba oset tajung agi yanglu aser iba sü jagi Ultra Violet (UV) ray tem nokdanger.