Kaketshirtem rong nung jakla yimya tajung alitsü ajungshir: Vikho-o

(Abelen) Kohima nung tentetba The Vineyard School kaketshirtemi marathon asemteptsü tetoktepba nung shilem agiba noksa angur. (Achijilen) Nagaland MLA, Vikho-o Yhoshu-i tongti tesemdanger onük jembiba noksa angur. (Kohima, March 21)

Kohima, March 21 (TYO): Nüburtem rong nung lenisütsü, amaliteptsü, ochi ashitsü aser temzüng ozüng kübok alitsü tangatetba tajung alitsüji kanga dang tongtipang ta shia, item jakla yimyatemji kaketshir ka aliba mapang nungi tenzüka benshitsü tajungshiba olen ka Nagaland MLA, Vikho-o Yhoshü-i tanü, Hombar nü metetdaktsüogo.
Kohima kübok The Vineyard School Annual Sports Week 2016 tetenzükba sentong nung tongti tesemdanger onük jembidang pai tanü iba olenji sangoktsü.
“Nisung ka taküm nung kaketshisatsü bushiba den külemi, saisapongtsü  shilema tongtipang lir. Anungji, kaketshirtemi saisapongtsüren nung shilem agiba ajanga pei taküm tia junga alitsü aser tajunglen tangar den toktepa alitsü ajungshir,” ta pai ajungshia ashi.
“Saisapongtsüji takok anguba mesüra tamakok ajuruba dang masü ta kaketshirtemi angatettsüla. Saisapongtsüren nung telatetba temzüng ozüng ama meinyakba ajanga tamakok ajuruba ama, nisung taküm nunga tim mesüi inyakba ajanga tamakok ajurur,” ta pai shisem.
Tongti tesemdanger onük jembiba jakdang Vikho-o-i school wako salatsüba den külemi, parade teloktem nungi salem agizüka liasü.
Football, Volleyball aser marathon densema, saisapongtsü shilem ishika tanü asayaba sülen asüng, Mongolbar nüa athletics asaya balala toktepa asayatsü sentong lir.