S Korea: Zika Virus agi shiranger nisung 1 buba puteter

Seoul, March 22 (Agencies): South Korea nung merila ajanga prokshidaktsüba Zika virus agi shiranger nisung mezüngbuba putetba osang ka South Korea Disease Control & Prevention Centers nung director, Jung Ki-Suck-i tanü, Mongolbar nü metetdaktsüogo.

“Tawa Brazil semdangba sülen S Korea-i tanaben shilanger arishi küm 43 tain tebur ka dak Zika virus tashidak keta aliba osang bushitetogo,” ta Jung-i osang jangjashitsü.

Paisa ashiba agi, iba nisungbaji tangar shinga dena majurudaktsüi Seoul yimtiba nungi kilometer 300 shi pilar Gwnangju nung tentetba mozüki ka nung tan anepalua lir.

Latin America nung kanga sashia poktetba Zika Virus ya meimchir nem lendong bener arutsüba tashidak kabo masü saka tetsübok nung alir tanur tekolak temang den meputepi ila kümdaktsüba microcephaly tashidak aser Zika Virus na sentaktepba aliba osang bushitetba sülen alima ajungai iba tashidak nokdangtsü maparen tenzüka lir.

Brazil kisüng nung kinü tanur 4000 shi dak microcephaly tashidak aketba osang bushitetba osang ka World Health Organization (WHO)-ia metetdaktsüogo.