Miim mozü mashii mayoktsü aser mayutsü ozüng azüng

Kohima, Jul 25 (TYO) : Tang temendakba Nagaland Legislative Assembly senden nung ozüng tasen ka tenüng agi “Nagaland Poisons concentrated acid and corrosive substances possession and sale rules 2015,” latetogo.

Iba ozüng nung shia aliba agi, kodangsa miim aketba mozü yokdir, ibaji jungjunga aleptsüla aser iba talep mesüra pongdang nungji temerem agi English aser liso oshi nung tekümdangtsü o zülua alitsüla.

Health & Family welfare, Food & Drugs Administrative Wing ajanga ashiba agi, iba miim aketba mozü mesüra osettem agi tanga osettem meraksadaktsütsü aser lendong masütsüsa inyaktsü asoshi Standard Operating Procedure (SOP) ka lir, anungji iba inyakyim nung shia aliba ama inyaktsüla ta kasa ozüng nung latetja lir.

Iba ozüng tasenba nung shia aliba agi, sorkari shimtetba Sub Inspector aser temalen alir police officer mashi kati mapang mashi ka nung  miim mozü ayukdakji reprangdangtsü asoshi tashi alitsü.

Iba ozüng nung shia aliba miim  mozütemji  Acetic acid, Sulphuric Acid, Hydrochloric Acid, Phosphoric Acid, Hydrofluoric acid, Nitric Acid, Oxalic Acid Hydrogen peroxide, Phenol amalatem lir.