Rio Olympics nung tatemsüa shilem agitsü: Usain Bolt

London, March 22 (Agencies): Alima ajunga nung tekaratisang ta ajasang, Usain Bolt-i taküm Brazil kübok Rio de Janeiro Olympics nung shilem agiba sülenbo Olympics nung joko shilem magitsü lemtetba osang ka metetdaktsüogo.
Taoba mapang Olympic gold 6 tashi agizüksang, Bolt-i Tokyo nung asayatsü ayongba 2020 Olympics tashibo shilem agitsü osang taküm January ita metetdakja liasü saka iba telemtetbaji melenshia, Rio Olympics nung tamtemsüa shilem agitsü asoshi Bolt-i tan lemtetshir lir.
“Rio Olympics ya ni atema tatembangba Olympics alitsü. Ni Olympics gold medal 3 tashi maneni agizüktsü alizüng yua lir aser iba alizüngji asangsang nung ajangzükra, tarutsü mapang nung tokteptsü menungdaki akümtsü,” ta Jamaica nunger arishi küm 29 tain Bolt-i metetdaktsü.
Bolt-i 2010 Beijing Olympics nung gold 3 agizükba sülen  2012 London Olympics nunga tebur 100m, 200m aser 4x100m relay tetoktepba gold agizüka lir.
Taküm August ita asayatsü ayongba Rio Olympics nunga Bolt-i maneni tebur 100m, 200m aser 4x100m relay tetoktepba gold agizüktsü alizüng yua lir.
Bolt-i second 19.19 nung 200m alizüng tonga yangluba world record otsü maneni tajemba mapang nung yanglushitsü alizüng ayuba osanga angazükogo.