3 buba 10-Northern Angami T20 Bash 2016 tenzükogo

Kohima, March 22 (TYO): Tanü, Mongolbar nü nungi tenzüka 3 buba 10-Northern Angami T20 Bash 2016 Kohima kübok Kohima Village Ground nung asayatsü tenzükogo.
Telok 16 tashi shilem agiba asayamong lapokba sentong nung State Mission Director SSA Nagaland, Thejawhelie Gregory Sote tongti tesemdanger liasü.
Nagaland Parliamentary Secretary, Youth Resources & Sports, Music Task Force & State Lotteries, Khriehu Liezietsu-i tongti shilem agia iba T20 asayamong ya taküm agi kümsembuba asayar  lir.
“Khriehu-i par constituency nung alir lanurtem saisapongtsüren nung ajungmeso atema pelar. Asayartemia temaba jenjang nung shilem agitsü nükla nung tajungtiba agüja shilem agitsü ajungshir,” ta tongti tesemdangeri metetdaktsü.
Tan asayamong nung shilem agir telok 16-i league asaya toktepa asayaba sülen Group 4 shia nungi temaba jenjang angur telok 2-i quarterfinal nung shilem agitsü jenjang angutsü.
Iba asayamong ya taruba April ita 6 nü tembangtsü sentong lir.
Ano külen, tanü mezüngbuba anogo nung Upper Bayavü Sixers teloki wicket 6 agi defending champions, High School Daredevils telok akok aser Lower Bayavü Gaints telokia wicket 9 agi Lower L. Khel Vikings telok madak takok ngua liasü.
March 23 nü asaya yamai alitsü:
Rokabozou/Sepfüzou Challengers vs Upper L. Khel Riders (7:00 am)
Tsütuo Knights vs P. Khel Eagles (10:30 am)
Peraciezie Royals vs Zienuobadze Highflyers (2:00 pm)