Kerry-i Putin o Lavrov na den ajuruteper

Moscow, March 23 (Agencies): US Secretary of State, John Kerry-i tanü, Bodbar nü Russia yimtiba, Moscow tonga ogo.

Kerry-i tanü Moscow tonga aoba sülen Russia Tir, Vladimir Putin aser Russia foreign minister, Sergei Lavrov na den Kremlin nung ajurutepa Ukraine aser Syria na den sentakba onük benoka jembiba osang jangjaogo.

Parnoki Belgium yimtiba, Brussels nung yashi, Mongolbar nü lendong atalokba den sentakba onüka benokba osang angazükogo.

Putin-i Syria nung yutsüba Russia mitkar shilem tuluba ka anitetadoktsü osang taoba hopta alima dang sangoktsüba sülen Kerry-i Moscow semdangtsü sentong renemba ama, pai tanü asangsang nung Moscow tonga aoba osang ka US State Department-ia metetdaktsüogo.

Syria nung tongpang rarabaren anentsütsü, timtem toushi tia ajurua alirtem nem tajemtsü tzü, chiyongtsü aser mozümora densema, nungdakba teyari oset tetsükdakba kecha meli tongtsütsü aser par linük nung yimtenren tebentetbaren bener aruja teti asoshi yimji yimjung tensa lidaktsütsü onük tanü lenirtemi benoka liasü.

Ano, Syria aser Iraq na nung lendong kanga sashia atalokdaktsüba kiralongrar telok, Islamic State meshimeshia samatsütsü onüka parnoki benokba osang jangjaogo.

Ano külen, Ukraine sorkar aser sorkar anemer na tsüngda taoba February ita tanaben agishiba yimjung tezüngzüktep mapa küma inyaktsü asoshi Russia-i par Russia pusemer Ukraine sorkar anemertem ajungshitsü onüka Kerry-i tanü benoka liasü.

Kerry-i tan Russia semdangdang nisung tepsetba maparen nung tangar yariba ken o nung aija tepuokdak küm 22 tashi puoka ayutsü temerenshi tan Moongolbar nü agizükla, Ukraine’er tetsür tayimtsü anishir, Nadiya Savchenko-a tepuokdak semdangtsü sentong renema lir.

Ukraine tongpang osangtsüsang abener Russia nunger osangbener 2 2014 küm tepsetertem yariba ken o nung Savchenko aija lir saka US-i lai aibelena mali ta metetdaktsüogo.