Brussels lendong atalokdaktsür, Najim Laachraoui puogo

Brussels, March 23 (Agencies): Belgium yimtiba, Brussels nung yashi, Mongolbar nü lendong atalokdaktsür rong nung densemer ta temulung malemba nisung, Najim Laachraoui police-i tanü, Bodbar nü apuba osang ka Belgium nung adokba osangkaket, DH-i tanü sangoktsüogo.

Pei temang nung alenokba bomb pokdakja yashi Brussels tayimtsü anendak pokshitsü lendong atalokdaktsür rong nung densema lir ta temulung melemi bilema, police-i Najim aputsü bushia liasü.

Yashi tayimtsü anendak lendong ataloktsü minute ishika jakdang Najim-i korang ka aser tola temsüng ka semer tayimtsü anendak telungi aiba noksa tayimtsü anendak ayuba CCTV ajanga tangokba osang jangjaogo.

France yimtiba, Paris nung yaküm pokshitsü lendong tesashi atalokdaktsürtem amongba kidang Najim indang DNA-a anguba osang ka prosecutor-temi metetdaktsü.

Parnokisa ashiba agi, Najim-i Brussels yimti nung anogo 5 tejaklen apusang, Paris lendong atalokdaktsür ta temulung melemi bilemer, Salah Abdeslam den aroki Hungary bushia yaküm September ita aoba osanga bushitetogo.

Najim den aroki tayimtsü telungi ayir adianu ana – Khalid aser Brahim El Bakraoui nati yashi pokshiba lendongji atalokdaktsü ta police-i temulung malemba olen ka metetdaktsüogo.

Yashi Brussels lendong nung ishiba agi nisung 30 shi poksetba aser nisung 300 dak tema yiruba osang tang tashi nung bushiteta lir.