TB anema longjemer raratsüla

Alima nung tuberculosis (TB) tashitak samatsütsü nükjidong nung kümshia March 24 nü omen balala nung ajemdaker ‘World Tuberculosis Day’ ayongzüka amunger aser taküm küm atema World Health Organization (WHO)-i ‘TB tashitak samatsütsü asoshi longjemtsüla’ omen shimteta amunger. Alima nung nisung jenti tepsetba tashitak rongnung iba tashitak ya densema lir. 2014 küm nisung million 9.6 TB tashitak ajanga shirang aser iba küm nisung million 1.5 asü. 2030 küm tashi nungbo alima nung TB tashitak meshimeshia samatsütsüji Sustainable Development Goals (SDGs) nükjidong lir aser iba dak sentakba nung anogo ishika tejaklen WHO-i alima linüktem aser partner tem dang TB anema longjemer raratsü atema sangoktsüogo. 2000 küm nungi tenzüka TB tashitak anema raraba nung tongbang tesadang kabo kokogo, kechiyong tesüiba küm 15 nung nisung million 43 iba tashitak nungi kümzük, ajisüaka iba takokji tongbang tesadang ka dang akokba ama züngshir, kechiyong tang alima nung anogo shia iba tashitak ajanga nisung 4,000 taküm samar. Alima sorkar temi longjemer research agirtem, lokti tentettem, mulungtet teloktem, nija sector aser terenlok agency tem den teka amteper inyak nungdang iba tashitak samatsütettsü. Iba tetezü, TB tashitak anema ajak longjemer raratsüla. Tang linük aikati pei sorkar sasep nung TB atema mapatong balala benoka inyaker iba den külemi linük karibo research agirtem teyari agia tashitak tendangba osettem, mozü aser vaccines nung terenlok nükjidong yur inyaker. India sasep nunga sorkari linük nung TB tashitak meshimeshia samatsütsü nükjidong yur mapatong balala benoka inyaker. Yakünü India sorkari, tuberculosis tashitak den raratsü asoshi mozü tasen ‘Bedaquiline’ tenzüktsüogo iba den külemi mera tasen aika agitsü aser iba atemaji senotsü peria amshitsü, ta sangdongogo. TB tashitak agi asürtem 100 shilem nung shilem 95 bo sensaker linüktem aser tang renloka aoba linüktem nung lir. Ano külen HIV aketertem timba tepsetba tashitakji TB tashitak lir; 2015 küm HIV aketer asür nisung asem nungi kabo TB tashitak ajanga asüba osang lir. 2000 aser 2014 küm tsüngda TB tashitak putetba sülen treatment agiba ajanga nisung million 143 shi taküm kümzükogo. TB tashitak yagi tepokpok nung kongshir ajisüaka temang nung tanga tenük-telen nunga kongshitsü akok. TB aketba temaitsü aika mali süaka tali aketba, alok-metzü nung azü densema aliba, temang metaba, aonung asentzü tali asenba aser temang touzük ajema akümba nunger lir. Ano temang nung tanga tenük-telen nung kongshira item temaitsütemjibo balaka asütsü. Tepokpok nung TB tashitak aketertemi aketdang, metzü metsüdang, o jembidang mesüra aachidang mopung nung tashitak prokba ajanga tangar nem menaloktsür. Ajisüaka ‘latent’ TB aketertemibo iba tashitak meproker. TB tashitak kanga active süa alirtemji HIV/AIDS agi shiranger aser moko mesepertem lir. Küm shia alima nung nütsüng shilem kabo iba tashitak menar. Alipokli nungi alima nung tashitak tasen jenti adoker, ajisüaka science aser medical terenlok ajanga alimai taneptsü lenmang nguteter. Ali meimchirtem ajak kenübosa asütsü, kar arishi nung tain kümer asür, kar lendong balala nung asür aser kar tashitak balala ajanga asür, ajisüaka alima nung tasoshia timtemer asürtemji AIDS, cancer aser TB tashidak agi asürtem ya asütsü südi. Tashitak kar azüabong mazüokba ajanga menar, tashitak karbo tetsü-tebou azü nungi arur, tashitak kar achi-ajem mazüokba ajanga adoker aser nisung karbo tia makai tangar dak nungi menazüker. Alima matem tashi tashitak balala alitsü, ajisüaka pei sasa kümdangba, temang nung timtem tilaka adokdangyongi mapang shitak nung temang tendangba aser teyari balala agiba ajanga asenoki tashitak koktettsü lenmang sademsadema lir. Tanü WHO-i alima linüktemi longjemer TB tashitak anema raratsü sangoktsüdang asenokia pei sasa kümdanga aliba den timtem adokdang mapang shitak nung teyari bushiba, kinüngertem, tembartem aser asen meketa alirtem den iba tashitak aser teyari balala indang osang lemsatepba ajanga iba tashitak anema raraba tongbang nung shilem agir asütsü.