Dimapur DC-i meshisadangi ozüng agütsü: UNTABA

Dimapur, March 23 (TYO): March 21, 2016 nü Deputy Commissioner, Dimapur-i meshisadangi Doldoli Reserved Forest area nung Nagaland tsütsü tenokdangba ozüng agütsü, kechiyong iba tesem nung tensa junga dang lir, ta UNTABA sangdong ka nung metetdaktsü.
Iba sangdong nung Dimapur Deputy Commissioner-i state ana tsüngda arrtsü tejangja ladanga aliba metetdaktsü nung jungla. Arrtsü ken o indang osang tejangja meteti Deputy Commissioner kati mebilemdangi ozüng agütsübaji shisa maka inyakyim ka lir aser iba ajanga mepetmesü kar adokra pa indang tebilemtsü asütsü,  ta UNTABA Chairman, Hukavi T Yeputhomi aser Gen Secy, Imsumongba Pongen nati sangdong nung shia lir.
Arrtsü anasa aliba loktitemi maneni yimjung nung alitsü mepishir aser ano Assam state nung election dak sendakba mapa inyakba mapang tanga Sectoral Border Peace Committee temi tensa meraksatsüsa mapa inyaktsü ayongzüker, ta UNTABA mendenpurtemisa metetdaktsü.