Assam Election atema tekümdangtsü sangdonger

Dimapur, March 24 (TYO): Assam nung Assembly Election agitsü aliba dak sentakba nung Assam-Nagaland arrtsülen Assam tsütsü kilometer 5 telungtet nung aonung curfew alitsü ozüng agüja lir. Anungji, Mangkolemba Sub Division kübok yimtsüngtem aser Village Council Chairman temi iba osang nüburtem dang metetdakjang ta Mangkolemba ADC, T. Imtiwapang Aier-i sangdong ka nung ashi.
Iba tesem nung aonung 8:00 ako nungi anepdang 5:00 ako tashi gari aser nisung mesenzütsüla, kechiyong District Administration, Jorhat-i aonung nungi anepdang tashi curfew benokogo, ta paisa metetdaktsü.
Kasa sangdong nungsa ADC-i yimtaklirtemi shikaritsü densema nüngdak balala atema prangpong bener mesenzütsü, kechiyong ibaji ajanga mepetmesü adoktsü akok, ta tekümdangtsü olen ka metetdaktsü.
Iba dak alia Assam nung Election Model Code tenzükogo, anungji Assam adena senzüdang nisung shingaia sen 50,000 dak tema bener mesenzütsüla, ta Mangkolemba ADC-isa ashi.