Nisung taküm tenla agütsüba ken o nung 5 pua lir: Nepal

Kathmandu, July 26 (Agencies): Arishi küm 10 tain tebur chanu ka tepseta taküm tenla agütsüba ken o nung ajemdaker Nepal nunger nisung 5 tashi Nepal southwest tsütsülen nungi apuba osang ka police-i tanü Honibar nü metetdaktsüogo.
“Asür Jivan Kohar samar anogo 3 tashi bushitepba sülen pa indang tasümangji India arrtsülen, Nawalparasi district kübok Kudiya yimtsüng nung angu,” ta police ketdangser, Nal Prasad Upadhyaya-i ashi.
Paisa ashiba agi, Kohar indang tekong kotari agi rangdangtsür liasü.
“Kudiya yimtsüng nung alir arasentsüri tuyuba ama inyaka, shiranga alir jabaso nungi temenen tanüla aridoktsü nükjidong nung shirangsang tebui Kohar-ji tepsetba nangzükogo,” ta pai metetdaktsü.
Shirangsang tebui par kidangser kar jasemer külen Kohar nem amtsük aser US nunger cent sen 50 agütsütsü mesüzüka Kohar-ji nisung shinga maliba tesem kati anir ao.
Yamaji inyakba sülen, shirangsang tebui Kohar tepseta külemküja sentong ka agir külen Kohar indang tasümangji süngsem ka anasa miima yutsüba osang jangjaogo ta Upadhyaya-i ashi.
“Tan pua alir 5 prongla anema nisung tepsetba ken o benokogo,” ta pai shisem.