Kin trok sanger lanurtem saisapong sentong aka

Mokokchung, March 27 (TYO): Mokokchung kübok Imkongmeren Sports Complex nung 1 buba Eastern Nagaland Youth Sports Meet tan March ita 24-26 nü tashi takok tulu ngua agiogo.
Elation Sporting Association (ESA) teloki ‘Saisapong ajanga temelenshi’ omen nung ajemdaker ayongba asayamong nung Mokokchung jila nung alir Konyak, Chang, Sangtam, Yimchungrü, Phom aser Khaimniungan kin nungi lanur noklang aikati shilem agia liasü.
Tebur football, tetsür tiger five, tebur o tetsür volleyball aser tebur o tetsür 100m aser 4x100m asemteptsü tetoktepbatem tan asayamong nung agi aser Konyak teloki overall champion takok ngua liasü.
Konyak telok sülen anidaka, Chang teloki overall shilem nung tanabuba jenjang anguba osang jangjaogo.
Tebur football tetoktepba nung Konyak aser Chang nungeri 1 aser 2 buba jenjang ajangzüka liasü.
Tiger five tetoktepba nung Khaimniungan aser Konyak tsürtemi 1 aser 2 buba jenjang angu, tebur volleyball tetoktepba nung Phom aser Chang nungeri 1 aser 2 buba jenjang ajangzük aser tetsür volleyball tetoktepba nung Konyak aser Khaimniungan tsürtemi 1 aser 2 buba jenjang ngua liasü.
Tebur 100m tetoktepba nung Chang aser Sangtem nungeri 1 aser 2 buba jenjang angu, tetsür 100m tetoktepba nung Sangtam aser Chang tsürtemi 1 aser 2 buba jenjang ajangzük, tebur 4x100m tetoktepba nung Chang aser Phom nungeri 1 aser 2 buba jenjang angu aser tetsür 4x100m tetoktepba nung Phom aser Sangtam tsürtemi 1 aser 2 buba jenjang ngua liasü.
Individual shilem nunga senpet balala agütsüba osang jangjaogo.
“Nagaland anüdoklen alir kin 6 sanger rong nung saisapongtsü ajungshitsü aser parnok rong nung telungjem aser tesendaktep tajung lidaktsütsü nükjidong nung tan asayamong ya ayonga agiogo,” ta ELA ketdangsertemi metetdaktsü.
Tan asayamong tenzükba sentong nung Ao Kaketshir Mungdang (AKM) nung Tatong Tir, Akummeren aser asayamong tembangba sentong nung Mokokchung District Football Association (MDFA) nung Tir, Apongti na tetushi tejaoker liasü.