Mkg TB Hospital nung CBNAAT machine amenokogo

Dimapur, March 28 (TYO) : March 24, 2016 nü District Tuberculosis Centre Mokokchung nung Cartridge Based Nucleic Acid Amplification Test (CBNAAT) machine amenokogo.
Mokokchung nung CBNAAT machine amenokba ajanga joko tanga state temi Multi Drug Resistant Test meyoktsü. TB agi shiranga anepalurtem TB centre nung CBNAAT testing agitettsü.
District TB Centre nung CBNAAT machine ji National Highway, Mechanical & Election Minister, Nuklutoshi-i lapoktsü aser iba sülen IMDH OPD Hall nung World TB Day sentong agi.
Nuklutoshi-i tongti tesemdanger o jembidang, CBNAAT machine ajanga Mokokchung district nung dang masü saka temeket aliba district tem nunga TB anema inyakba mapa nung teyari tulu angutsü, ta ashi.
Paisa, doctor aser nurse tem dang kanga dang nendaka TB tashidak anema mapa inyaktsü ayongzük.
Sentong nung Chief Medical Officer, Mokokchung Dr S. S. Aka-i o jembidang Mokokchung TB Centre-i TB anema raraba mapa nung takok angubatem indang osang metetdaktsü.
TB ya aneptsü akokba tashidak ka lir aser CBNAAT machine amenokba ajanga iba tashidak anema inyakba mapa nung teyari tulu angutsü imlar, ta paisa shisem.