Divine Bridge Ministries-i Delhi nung Burmese refugees atema youth camp katsü

New Delhi, March 28 (TYO) : Delhi nung Divine Bridge Ministries (DBM)-i Burma nunger refugee lanurtem asoshi anogo asem tashi (22nd- 24th March, 2016) Youth camp ka ayongzüka agiogo.
Pei taso lima nung tali majungba aser timtem jenti aliba agi Burma nunger aika bendang lima tesem balala nung proksha lir. India linük nunga Burma nunger refugees Lakh ka dak tema aruagi jenoka lir ta United Nations High Commissioner for Refugees (UNHCR) ajanga ashir.
Item rongnung Delhi ya parnok asoshi tejennokdak tesem tongtipang ka lir. Anungji parnok tanela nüngdak aser timtem balalatem ajitetta DBM-i parnok den tanela mapatem inyakdagi aser lenmang balala nung teyari agütsür.
Youth Camp nükjidongji “The Born Identity” liasü aser Camp Director Mr. Supongchiten-i anir iba Camp nung tongti o jembirji Mr. Alemmar, Director, Guilt To Grace Ministry, Dimapur, Nagaland den Pastor Ross & Cobus, South Africa, Mr Matsung (Asso. Pastor Youth, Delhi Ao Baptist Church) aser Mr Wati Joshua (Director, Campus Youth Mission, Delhi) nungertem liasü.
Iba Youth Camp nung adentsu asoshi Delhi nung aliba Burmese Refugee tem arogo balala nungi lanurtem 70 (Seventy) shi arua shilem agi. Omen nung ajemdaker lanur ka taküm Tsüngrem den jajatsü aser tesentaktep tajung yua Kotaker Senso akümtsü tayongzükbatem agüja lanurtem jenti temoatsü ngua Tsüngrem nem parnok taküm bendanga agütsü, ta DBM sangdong ka nung metetdaktsü.