MTLT-i Mokokchung Deputy Commissioner agientsü akhanger

Dimapur, March 28 (TYO) : Mokokchung Town Lanur Telongjem (MTLT) aser Mokokchung nung aliba sensotemi Mokokchung Deputy Commissioner dak temulung melemtettsüsa kümogo anungji pa Mokokchung nungi agientsüla ta MTLT-i sorkar nem tezüluba nung takhangba ka agütsüogo.
Mokokchung Deputy Commissioner-i district nung ketdangsüba tekolak ka ama pa teinyaktsü mapatem meinyaktet aser iba jagi joko nübortemi pa ketdangsüba nung temulung malemer, ta MTLT-i sangdong ka nung metetdaktsü.
March 7, 2016 nü Mid-Day Meal (MDM) jang tamajung alemba osang angazük aser iba atema MTLT-i school kar semdangdang jang tamajung agütsübaji kuli angu. Iba onük atema MTLT-i March 9, 2016 nü Mokokchung Deputy Commissioner dangi tezüluba ka nung aser osangkakettem mapa inyaktsü metetdaktsü, saka DC-i iba onük atema mapa inyaktsü melena CrPc 1973 nung ametter sensosangertem amokmeren, ta MTLT sangdong nungsa shia lir.
Deputy Commissioner ji District Level Steering-cum-Monitoring Committee nung Chairman lir aser pai jang tamajung agütsüba inyakyim süoki ia magizükba ajanga pai school kaketshirtem atema mebilemtsüba sayur. Anungji pa ama ketdangser ka district nung mayutsüla, ta MTLT-i metetdaktsü.
Tanabuba nung Mokokchung Deputy Commissioner-i yaküm LDA, Dobashi aser Driver mapatem tazüng aliba osang metetdaktsü aser item mapa atema interview ji 2015 küm tom ka nung agitsü sentong liasü, saka item interview magii thinen. Interview tem tekaratiba nung agitsü atema bangdak teloktem aser mulungtet telok aikati Mokokchung DC nem tezüluba agütsüogo, saka telangzüba kecha mali. Mapa tazüngtem atema zünger mapa mongui aliba lanur aikati tenüng agüja lir, saka interview magiba ajanga tenüng agütsürtem teimla samaogo aser iba asoshi Mokokchung sensotemi DC dak temulung malemer, ta MTLT-isa ashi.
Tasembuba nung, 2015 küm Mokokchung nung alirtem ita ka den talangba electricity mongui timtem ajuru saka Mokokchung DC-i iba khuret süoki ia mebilemtsü. Nübortem timtem maremtetba agi Mokokchung power division office aser Deputy Commissioner office nung lungkak aittsüsa aküm saka tia kaa iba mapang Mokokchung district nungi MLA tem DPDB senden nung adentsü arua liasü aser parnoki tekaratiba nung iba khuret reprangshimtsü nangzükba ajanga tensa meraksai songtem. Iba onük nunga Mokokchung DC-i district nung tekolakba mapa meinyaktet, ta MTLT-isa metetdaktsü.
Ano, NEC-i sen crore 750 teyari agüja yangluba Interstate Bus Terminus (ISBT), Mokokchung ya August 1, 2011 nü lapokaka, tanü tashi mapa küma metenzükteter. MTLT-i aiben iba onük ya district administration dangi benogo, ajisüaka, tanü tashi ISBT metenzükteti lir. Mokokchung DC-i iba onük atema pa teinyaktsü mapa meinyakba ajanga pai India sorkar aser NEC-i inyakba mapatongtem nung tetsükdaktsü ajurudaktsür, anungji iba ama ketdangser kaji lokti nung nüngdak mali, ta MTLT-isa metetdaktsü.