District ajak nung human rights court lapoktsüla: SC

New Delhi, July 26 (Agencies): Meimchir temeten balala alema aibelenba ken o tem tekaraba nung katettsü asoshi district ajak nung special courts lapoktsüla ta Supreme Court-i state ajak dang metetdaktsüogo.
SC-isa state sorkar shia dang, tepuoktak balala aser police station nung meimchir temeten anema meinyaktsü asoshi küm ka tsüngda police station aser jail ajak nung CCTV camera inoktsüla, ta tuyuogo.
“Kechiba state ajak meyong Jail nung CCTV camera meinoktsüla, onoki kuli mangur. CCTV camera ajanga tepouktak alirtem anema meimchir temeten alema inyaktsü aliba nokdangba nung yaritsü. Ibaji ajangasa ketdangsertemi tepouktak alirtem junga azüokba nung yaritsü aser aibelen inyakba putetba ajanga mera tajung agitettsü. Iba ya onok tangatetba nung inyaktsü aser iba tetuyuba agütsüba anogo nungi tenzüka küm ka tsüngda tashi nungbo inyaktsüla,” ta Supreme Court bench ka nungi Justice T S Thakur aser R Banumathi nati ashi.
SC-i ashiba agi, Sikkim dak alaka district ajak nung special courts lapoktsü atema state katia Human Rights Act dak sentakba benoka mali.
“Iba dak sentakba nung sorkartemi kecha merangdanga mali. State sorkartemi inyaktettsü kaji, parnoki pei pei state indang high court chief justice den benoka jembitsüla aser district shia nung Human Rights Court lapoktsü atema shisadangtsüla,” ta bench-isa ashi.
“Protection of Human Rights Act, 1993 Section 30 nung ajemdaker human rights courts lapoktsü atema state sorkartemi nüngdakba mera agitsüla,” ta parnoki ashi.
Meimchir temeten anema kanga bolua inyakbaken jenjang anabuba, Delhi nung kechiba state human rights commission (SHRC) melapok ta bench-i shia ita trok tsüngda human rights watchdog panel ka tentettsü atema mapang züngzüktsüogo.
Bench-isa Arunachal Pradesh, Mizoram, Meghalaya, Tripura aser Nagaland nunga state human rights commission (SHRC) tentettsü atema tuyuogo.
“Human rights aser ibaji kümzüka ayuba nung o atsüteptsü nüngdak madoker. Meimchir temeten kümzüka ayutsüji India nung dang masü. Iba ya alima rangben nung lir. Iba Act nung section 22 reprangshimtsü nüngdak,” ta bench-i ashi.