Madhuri Dixit-a ‘So You Think You Can Dance’ nung tetendanger asütsü

Mumbai, March 29, 2016 : Bollywood nung tsüngsanger tajungtiba rongnung ka, actress Madhuri Dixit-a India “So You Think You Can Dance” sentong nung tetendanger tasembula asütsü züngokogo.

‘Kathak’ tsüngsang yimya nung tsüngsangtsü training agir alila, Madhuri-i la dak tsüngsangtsü sempet aliba Hindi film aser nüngtugu ken aika nung sayuogo. Tsüngsangdang lai la tejak yimya agi ken agi shinüba sayuteter aser ibaji ajanga la dak sempet tulu aliba tali jangjaa angur.

Madhuri ya tesüiba mapang nunga TV reality show “Jhalak Dikhhla Jaa” sentong nung tetendanger liasü.

“So You Think You Can Dance” sentong TV nung yokba mapang Madhuri dang masü saka choreographers Terence Lewis aser Bosco Martis nata tetendangertem am shilem agiba angutsü.

“Bosco-i ‘street’ aser ‘raw urban style’ tsüngsangtem den technical tsütsü tendangtsü aser Madhuri-i ‘Indian styles’ nung tsüngsangba tendangtsü,” ta Lewis-i sangdong ka ajanga metetdaktsü.

“So You Think You Can Dance” International sentong nung shimoktsü asoshi yimti tulu kar nung tsüngsanger tapu balala adenshia tokteperang shimteter.

Iba sülen parnok sentong nung anioka toktepyonga tur final nung shilem agitsü pur shimteter.

India “So You Think You Can Dance” sentong ya April ita nungi TV nung yoktsü.