EgyptAir tayimtsü ka tashiyim agi azüoker nisung apu

Larnaca/Cairo, March 29 (Agencies) : Cyprus nung aliba Larnaca airport nung tanü anogo piyong nisung kati EgyptAir tayimtsü ka tashiyim agi azüoka ayuba sülen nikongtsütsü pa apu.

Iba nisungji Seif Eldin Mustafa ta jangjaogo aser pai Alexandria nungi Cairo-i aoba EgyptAir tayimtsüji tashiyim agi Cyprus nung anendaktsü.

Osang angazükba agi Mustafa jagi Egypt nung tepuokdak yua aliba tetsürtem chiokang ta takhangba agüja tashiyim agi tayimtsü sot, ta Cyprus osangbenertemi ashi.

Larnaca airport nung tayimtsü anendaktsüba sülen, Mustafa-i tayimtsü nung mena alirtem ajak chiok, ta civil aviation minister Sherif Fathy-i osangbener dang ashi.

Iba tayimtsü nung nisung 81 mena liasü aser parnok rongnung bendanger 21 aser crew züngsem 15 liasü, ta Egypt nung Civil Aviation Ministry-i metetdaktsü.

Iba nisung jagi Egypt nung tepuokdak yua aliba tetsürtem ajak chioktsü atema takhangba agütsü aser paisa European Union ketdangsertem den jembitsü atema takhangba agütsü. Aji agi iba ya yimtenren mapa ka asü ta temulung melemi bilemer, ta Cyprus Broadcasting Corporation (CyBC) aser private broadcaster, Antenna osangtem ajanga metetdaktsü.

Tayimtsü nung pilot Omar al-Gammal-i ashiba agi, nisung kati pa temang nung tapoktsü alenloka lir ta amokmerena tayimtsüji Larnaca-i anir ao, ta civil aviation ministry-i ashi.