Iran’er tarutsü jenjang ajungtsü atema missile nungdaker: Khamenei

Dubai, March 30 (Agencies): Iran linük indang tarutsü jenjang ajungtsü atema Iran linüki tongpang nung amshitsü missile yanglua kasaji rizüngtsü nungdaker ta shia, Iran’er Supreme Leader, Ayatollah Ali Khamenei-i par Revolutionary Guards metentsüba olen ka tanü, Bodbar nü metetdaktsüogo.

Iran-i alima tashi abenba linüktem den nuclear tezüngzüktep agibaren agizük aka, par Iran-i tarutsü mapang nung US aser par pusemba linüktem den tesendaktep mayutsü saka par Iran’er rongsenren aser mitkar jenjang tajungba kümdaktsütsü asoshi Khamenei-i metetakja lir.

“Missile masü saka jembitepba ajanga tarutsü jenjang ajungtsü ta bilemertemji tamashi mesüra pei linük memeimertem lir. Iran-i jembitepba mapatong dang inyaka tongpang osettsüset merizüngra, linük mashikati amokmerendang Iran-i tapet telangzüba magütsütettsü,” ta Iran’er telemtetba ajunga tatemküm agisang, Khamenei-i sangoktsü.

Iran’er Revolutionary Guards-i missile 4 tashi tan March ita tetenzüklen tendanga kadokba sülen Iran-i United Nations Security Council (UNSC) telemtetba anema inyaker ta shia, West-i par linük aitsütsü tenzüka lir.

Ajisüaka, Iran-i tan missile tendanga kadokba jagi UNSC-i agiba 2231 buba telemtetba anema meinyak ta UNSC nung züngsemba Russia linüki shia, Iran metentsüogo.

Ano külen, “Iran-i par ballistic missile tendanga kadokba ajanga tebilemtsü khuret bener arutsüogo. Ajisüaka, par linük anema tenokdangba sentong tasen benokshitsü mesüra mebenoktsü telemtetbabo UNSC nung züngsemba linüktemi ang agitsü,” ta UN Secretary General, Ban Ki-moon-ia metetdaktsüogo.

“Iran-i agiba mezüngbuba missile tendanga kadokba mapareni UNSC telemtetba anema meinyak saka tanüngba missile tendanga kadokba maparenibo UNSC telemtetba anema inyakogo,” ta Ban-i osang jangjashitsü.