MGHSS Mokokchung nung Biotechnology laboratory amenokogo

Dimapur, March 30 (TYO) : Mayangnokcha Government Higher Secondary School (MGHSS) nung Higher Secondary atema Science, Commerce aser Arts stream sayur aser tang iba school nung kanga nüngdaka aliba Biotechnology laboratory ka amenokogo.
MGHSS nung Biotech Lab ji Ministry of Science & Technology, Department of Biotechnology (North East Region) teyari ajanga amenok aser iba ya ajanga science kaketshirtem tajangzük tulu angutsü.
North East tesem nung Higher Secondary Schools 88 nem iba scheme kübok teyari agütsü aser Nagaland state nungi school pungu tenüng agütsüba nungi mezüngbuba shilem nung school asem shim.
Angazükba agi, biotech Labs teimba amenokba state ji Assam nung lir aser iba state nung higher secondary schools 55 nung biotech Labs amenoktsü teyari angu aser Assam sülen Manipur state lir.
Mokokchung Deputy Commissioner, Sushil Kumar Patel-i laboratory lapoktsü aser pai tongti tesemdanger o jembidang Department of Botany, Nagaland University Professor Dr. Chitta Rajan Deb-i MGHSS nung lab amenoktettsüsa mapa inyakba atema tenüngsang agütsü.
Biotech Lab amenokba ajanga MGHSS nung kaketshirtem dang masü saka Queen Marry Higher Secondary School aser Senayangba Government Higher Secondary school nungi science kaketshirtem teyari tulu angutsü, ta Mokokchung DC-isa ashi.
Iba sentong nung ADC Mokokchung Bendanglila, District Education Officer, Mokokchung I. Satemenla aser science stream agütsüba Higher Secondary School asem nungi kaketshir aser tesayurtem aden.