Nuclear Security Senden

Nuclear atomic bomb ya alima linüktem atema amokmeren tulu lir ta shisateta bomb tesashi amshia kiralongraba nokdangtsü nükjidong nung 2009 küm US Tir, Barack Obama-i küm pezü tsüngda alima nung nisung tamajungertem dang nungi nuclear osettem kümzüka ayutsü atema alima linüktemi merangtsüla ta tayongzükba agütsüba sülen 2010 küm nungi Nuclear Security Summit (NSS) senden mena alima nung nuclear raraba osettem kümzüka ayutsü atema alima linüktemi yaritepa inyaka arur, aser tang tesüsa NSS senden ya US yimtiba, Washington nung kadar. 2010 küm Washington nung mezüngbuba NSS senden alidang alima tesem ajaklen nungi nuclear raraba oset bendentsü nükjidong ayu aser 2012 küm South Korea, Seoul nung 2buba NSS senden nung- alima linüktemi senden tapet ayonga akaba den mapatong balala nung shilem agiba ajanga nuclear osettem kümzüka ayutsü bangjem. 2014 küm Netherlands, Hague nung 3buba NSS senden nung alima linüktemi senteper tongtibang sangdong aika agüja liasü. NSS senden asemprong ajanga takok aika nguogo. Takok tulu rongnung NSS ajanga linük 12 nungi Uranium aser Plutonium den nuclear facility 24 agientet. Iba dak alia NSS-i alima nung nuclear rizüngba tesemtem azüoktetba den külemi tim mesüi nuclear shishilembaba networks mittsü atema telok tentet. 2016 küm NSS tesüsabuba senden matongdangsa alizüng asem atongtsü bangjema liasü. Item alizüng rongnung nuclear facility aser nuclear osettem kümzüka ayutsü atema linük aikati tezüngzüktep agir alitsü bangjem, iba ozüng ajanga linüktemi nuclear osettem kümzüka tajung nung dang amshitsü aser rizüngtsü latet. 2010 küm senden nung, ano maneni linük 12-i tezüngzüktep agitsü nüngdak ta bangjemba sülen linük 5-i tezüngzüktep agi. Ano 2014 küm NSS nung tezüngzüktep agir linük 35-i, ‘Nuclear security mapatong tashi itdaktsür’ ta sangdonga liasü. Iba sangdong nung linük aika dena liaka Russia, China, India aser Pakistan densema linük tongtibang aika dena maliasü. 2014 küm March 25 nü NSS nung alima lenirtemi linüktem dang nuclear fuel ajema rizüngba ajanga al Qaeda ama kiralongar telok züngsemtemi atom bomb mongutettsü nükjidong nung yariteptsü ayongzük. Maneni tongtepratepa iba nükjidong atema inyaktsü asoshi NSS 2016-i lenirtem atema sabang ka tentettsü. Hopta ka tejaklen kiralongrartemi bomb tesashia asem amshia Brussels yimti amakdang nisung 30 dak tema tepsetba osang ano memekongi lia tang Washington nung NSS senden akar aser iba senden nung kiralongrar telok, ISIS ajanga alima amokmeren tia nung aliba onük tongtibangsüa jembitsü. Tim masüba nung nuclear amshiba ya alima atema amokmeren tulu ka lir, aser iba ajanga pei linüka kongshitsü akok ta linük aikati ratetogo. Alima tzü-mopung lendong tulu aika lir, aser itemjibo nisungi menokdangteter. Linük o linük na tsüngda, tamangba yimsü tsüngda aser tentet balala tsüngda meputepba ajanga nisungi yangluba lendong aika adoker. Tanü putu nung nisungtemi adokdaktsüba lendong nungibo tashi tulu aliba linüktemia mejenbuteter. Nisung tamajungertemi lendongji koma, kodang aser kong agütsütsü’ar memeteter, ajisüaka nisungi yangluba lendong yabo nokdangtettsü lenmang aika lir, ajioda tang NSS-i meranga inyakba ajanga alima nung nisung jenti asütsüsa lendong tulu aika ataloktsü aliba nokdangtetba yaa ka asütsü. 2010 küm atemzükba ama tang amenba NSS senden ya tatembangbuba senden asütsü, ajisüaka iba senden nungi ano tashitaitba sabang ka adoktsü imlar.