Rotary Rahat Medical Mission anogo pezübuba agiogo; Nisung aika teyari angur

Dimapur, March 31 (TYO) : District Hospital Dimapur nung Rotary Rahat Medical Mission ajanga angati medical camp ayongzüka agiba nung Nagaland tesem balala nungi nisung meyirjang aika teyari ngudar.
Iba Medical Mission ya March 28, 2016 nungi tenzük aser tanü pezünübuba tashi nung OPD patients 3000 den teimba züluokogo aser plastic surgery dena operation 120 jungnüa agiogo.
Anogoshia registration counter nung shiranger 1200 den teimba tenüng zülüoker aser Rotary Rahat Medical Mission Chairman, Rotarian Dr. Nitin Agarwal-i ashiba agi, ortho, general surgery, urology cases, eye, gynecology atema surgery 100 shi agitsü anünga lir.
Anogo nung operation 60-70 tashi agir aser ano maneni agitsü, anungji public-i azü tenlatsü mepishir, ta Dr. Nitin-isa ashi.
Medical Mission tenzükba anogo nungi Dimapur District Hospital aser Referral hospital nungi CMO-i anir doctor o nurse temi yaritepba atema kanga pelar, ta paisa metetdaktsü.
North East nung mission tulutibaji tang Dimapur nung ayongzüka agiba Rotary Medical Mission ya lir aser iba nung Nagaland sorkar, mulungtet teloktem, arogotem aser local nisungtemi lenmang balala nungi yaritepba atema kanga pelar, ta Dr. Nitin-isa ashi.
Rotary Rahat Medical Mission ya April 5, 2016 tashi alitsü.