India-Bangladesh train lenmang atema sen crore 1,000 lemzüktsür

Agartala, July 26 (Agencies) : India-Bangladesh railway mapatong atema India sorkari sen crore 1,000 lemzüktsüogo, ta ketdangser kati ashi.
Honibarnü centre sorkar-i Tripura sorkar dang Tripura nung train lenmang yanglutsü aser ali alizüktsü atema sen crore 580 lemzüktsüba osang metetdaktsü, ta Transport Secretary, Samarjit Bhowmik-i osangbener dang ashi.
Bangladesh nunger lushi nung lenmang tasen yanglutsü aser ali alizüktsü atema external affairs ministry-i sen crore 400 agütsütsü nangzüka lir.
June 6-7 nung prime minister Narendra Modi-i Dhaka semdangdang Bangladesh prime minister Sheikh Hasina den iba mapatong inyaktsü telemtetba agi aser iba sülen nungi Union cabinet secretary Pradeep Kumar Sinha-i ketdangsüa inyaker.
“Agartala den Bangladesh kübok Akhaura railway station sendakteptsü atema kilometre 15.06 train lenmang yanglutsü asadangteta alibaji engineers aser railway ketdangsertemi melenshiogo” ta Bhowmik-isa ashi.
Ali tajemba alizüktsü atema mezüng asadanga aliba nungi kilometer 3.7 ajema akümtsü tebilemba centre-i mulunga agizükogo, ta paisa shisem.
“Tripura aser Bangladesh tsüngda train lenmang tasenba ajanga linük ana tsüngda rongsenren aser shishilembaba tsütsü tesentaktep tajungba akümtsü” ta Tripura Transport Minister, Manik Dey-isa metetdaktsü.
Bangladesh den train lenmang tasenbaji yangluba sülen Agartala aser Kolkata tsüngda kilometre 1,560 tetsüngda itta aliba ya kilometre 515 dang akümtsü.